Torpağa rəy almaq üçün İldırım Məmmədova 25 min manat verdim - Şahid

Bakı Ağır Cinayətlər Məhkəməsində külli miqdarda rüşvət almaqda təqsirləndirilən 19 nəfər yüksək vəzifəli şəxslərin cinayət işi üzrə məhkəmə prosesi davam etdirilib.

News24.az-ın məlumatına görə, hakim Şəlalə Həsənovanın sədrliyi ilə keçirilən prosesdə şahid qismində dindirilən Niyaməddin Məmmədov bildirib ki, təqsirləndirilən şəxslərdən yalnız Pərviz Ələkbərovu tanıyır: "Pərviz Əlkbərovla bağlı məni Lənkəran rayon prokurorluğunun inzibati binasında istintaqa dəvət edib təzyiq göstərdilər. Mənim halım pisləşdi, təzyiq altında ifadə verdim. Müstəntiq məndən Pərviz Ələkbərovun əleyhinə ifadə aldılar.  Məni həbslə hədələyirdilər, qorxurdular. Mən də məcbur olub onların dediyi kimi ifadə verdim".

Prosesdə ifadə verən digər şahid Rəşad İmanov isə bildirib ki, İldırım Məmmədov və Sumqayıt şəhər bələdiyyəsinin nümayəndəsi Sərviz Süleymanovu tanıyır: "2003-ca ildən istifadəmizdə olan torpaq sahəsinə rəy almaq istəyirdim. Bunun üçün İldırım Məmmədovla görüşdüm. O buna görə məndən 33 min manat istədi. Mən razılaşmadı. Sonra dostum Sərviz Süleymanovun vasitəsilə həmin məbləği 25 min manata endirdi. 25 min manat İldırım Məmmədova verib müsbət rəy aldım. Pulu İldırım Məmmədova iş otağında verdim. Sonra rəyi verdilər". 

İttihama görə,  İqtisadiyyat Nazirliyi yanında Əmlak Məsələləri Dövlət Xidmətinin vəzifəli şəxslərinin qanunsuz əməlləri barədə həmin qurumdan daxil olmuş məlumat əsasında Baş prokuror yanında Korrupsiyaya qarşı Mübarizə Baş İdarəsində cinayət işi başlanaraq ibtidai istintaq aparılıb.

İstintaqla ƏMDX-nin Torpaqların dövlət idarəetməsinin təşkili və geodeziya şöbəsinin sektor müdiri İldırım Məmmədovun həmin Xidmətin vəzifəli şəxsləri, yerli ərazi şöbələrinin müdirləri, bələdiyyə sədrləri və digər şəxslərlə qabaqcadan əlbir olaraq dövlət qurumunun müvafiq ərazi şöbələrinin yurisdiksiyasına daxil olan ərazilər üzrə bələdiyyə mülkiyyətində olan torpaq sahələrinin mülkiyyətə, istifadəyə, icarəyə verilməsinə dair müsbət rəyin verilməsi məqsədilə 169 halda rüşvət almaları, vəzifə səlahiyyətlərindən sui-istifadə etmələri, eləcə də bir sıra hallarda vəzifəli şəxsin qərarına qanunsuz təsir göstərmələrinə (nüfuz alveri) əsaslı şübhələr müəyyən edilib.

Qeyd edilən faktlarla bağlı ümumilikdə 19 vəzifəli şəxs, Dövlət Xidmətinin işçiləri İldırım Məmmədov, onun rəhbərlik etdiyi sektorun baş məsləhətçisi Əsəd Nəsibov, Xidmətin Qazax, Beyləqan, Şəki, Ucar, Şirvan, Xaçmaz, Qəbələ, Cəlilabad, Bərdə, Lənkəran ərazi şöbələrinin müdirləri Ehtiram Eyvazov, Elsevər Paşayev, Mübariz Paşayev, Amil Aslanov, Nazim Səfərov, Aydın Cəfərov, Baği Məsimov, Mircəlal Xurşudzadə, Nicat Abbasov, Pərviz Ələkbərov, Abşeron rayonun Saray, Şəki rayonun Qoxmuq, Qazax rayonun Daşsalahlı, Salyan rayonun Şorsulu və Sumqayıt bələdiyyələrinin sədrləri Məhi Həsənov, Etibar Eyvazov, Asif Yusifov, Famil Məmmədov, Sərviz Süleymanov,  Sumqayıt bələdiyyəsinin icra aparatının təşkilat şöbəsinin müdiri Şıxəli Abbasov, Kürdəmir Rayon İcra Hakimiyyəti Başçısının Sosial-İqtisadi İnkişafın təhlili və proqnozlaşdırılması şöbəsinin müdir müavini Ruslan Əliyevə Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə), 311.3.1, 311.3.2, 311.3.3 (qabaqcadan əlbir olan bir qrup şəxs tərəfindən təkrarən külli miqdarda rüşvət alma), 312-1 (vəzifəli şəxsin qərarına qanunsuz təsir göstərmə (nüfuz alveri) və digər maddələri ilə ittiham elan edilərək barələrində həbs, ev dustaqlığı, vəzifədən kənarlaşdırma və polisin nəzarəti altına vermə qətimkan tədbirləri seçilib.

Samir Əli