TƏBİB-in departament rəhbəri məzuniyyətdə olarkən işdən çıxarılıb? RƏSMİ AÇIQLAMA

TƏBİB-in İnsan resursları departamentinin rəhbəri Günəş Qədimova vəzifəsindən azad olunub.

News24.az xəbər verir ki, Qaynarinfo-nun əldə etdiyi məlumata görə, Günəş Qədimova TƏBİB-in İdarə Heyətinin sədri Vüqar Qurbanovun müvafiq əmri ilə vəzifəsindən azad edilib. 

Vüqar Qurbanovun digər əmri ilə bu vəzifəyə müvəqqəti olaraq Emin Xasiyev təyin edilib.

Günəş Qədimovanın vəzifəsindən azad olunması ilə bağlı saytımıza ilginc məlumat daxil olub. Belə ki, o, şəxsi işləri ilə bağlı məzuniyyətə gedib. Məzuniyyəti bitib geri qayıtdıqdan sonra vəzifəsindən azad olunduğunu bildirilib. Hətta xanım məmurun iş otağından kreslosu da götürülüb.  

Məsələ ilə bağlı TƏBİB-in İctimaiyyətlə əlaqələr və marketinq departamentinin rəhbəri Zamirə Ədilova Qaynarinfo-ya açıqlamasında bildirib ki, Günəş Qədimovanın əmək müqaviləsinə xitam verilib:  "Məzuniyyətdən geri qayıdandan sonra işdən azad olunması ilə bağlı məlumata gəlincə, elə bir şey yoxdur. Müqavilə müddəti başa çatdığı üçün vəzifəsindən azad edilib".