“Muğan Bank”ın kreditorlarının NƏZƏRİNƏ! "25 dekabr tarixədək..."

Oktyabrın 27-dən etibarən ləğv prosesində olan "Muğan Bank" ASC-yə qarşı tələblərin yazılı şəkildə qeydə alınmasına başlanılacaq.

Bu barədə News24.az-a Əmanətlərin Sığortalanması Fondundan (ƏSF) məlumat verilib.

Bildirilib ki, "Banklar haqqında" Qanunun tələbləri nəzərə alınmaqla, müflis banka qarşı tələblər bankın müflis elan olunmasına dair məhkəmə qərarının mediada ilk dəfə dərc edildiyi gündən 60 təqvim günü ərzində ləğvedici tərəfindən yazılı şəkildə qeydə alınmalıdır.

Qeyd edilib ki, tələblərin qeydə alınması üçün kreditorlar öz tələblərinin hüquqi əsasını sübut edən sənədləri və aşağıdakı məlumatları təqdim etməlidirlər:

kreditorun adı və ünvanı;

tələbin əsas məbləğinə daxil edilən faizlərin və digər haqların məbləğləri;

tələbin təminatı olan girov (ipoteka) və ya qarantiya barəsində məlumat.

Ləğv prosesində olan "Muğan Bank" ASC-nin kreditorlarından xahiş olunur ki, 25 dekabr 2023-cü il tarixədək kreditor tələblərinin qeydiyyata alınması üçün aşağıda qeyd olunan ünvana müraciət etsinlər:

Ləğv prosesində olan "Muğan Bank" ASC-nin Baş ofisi.

Ünvan: Bakı şəhəri, Nərimanov rayonu, Əhməd Rəcəbli 21B.

Əlaqə: (+994) 941.

Xatırladaq ki, Bakı Apellyasiya Məhkəməsinin İnzibati Kollegiyasının 24 oktyabr 2023-cü il tarixli, 2-3(103)-54/202  nömrəli qərarı ilə "Muğan Bank" ASC müflis elan edilib və Əmanətlərin Sığortalanması Fondu Bankın ləğvedicisi təyin olunub.