Dəhşətli qəzada ölənlərin sayı üçə çatdı – Azərbaycanda dəhşətli qəza - YENİLƏNİB

Ötən gecə İsmayıllıda baş vermiş dəhşətli yol qəzasında ölənlərin sayı 3-ə çatıb. 

News24.az Publika-ya istinadən xəbər verir ki, İsmayıllı rayonunun Lahıc qəsəbəsində "BMW” markalı, 90 HK 850 dövlət qeydiyyat nişanlı minik avtomobili yol kənarına aşması nəticəsində sürücü, 1983-cü il təvəllüdlü Allahverdiyev Ramin Yaqub oğlu ilə yanaşı, daha iki sərnişini ölüb.
Belə ki, sərnişinlər – 1986-cı il təvəllüdlü Əliyev İsa Rövşən oğlu və 1979-cu il təvəllüdlü Kərimov Kənan Səyyah oğlu hadisə yerində vəfat edib. Daha bir sərnişin – 1972-ci il təvəllüdlü Seyifov Təyyar Cilovxan oğlu isə xəstəxanaya yerləşdirilib.

Bildirilir ki, avtomobil avtomobildə sərnişin kimi əyləşən Kənan Kərimova məxsus olsa da, dostu Ramin Allahverdiyev idarə edirmiş.
Faktla bağlı cinayət işi açılıb, araşdırma aparılır.

*** 09:00

Azərbaycanın İsmayıllı rayonunun Lahıc qəsəbəsində “BMW” markalı minik avtomobili yol kənarına aşıb. News24.az FHN-ə istinadən xəbər verir ki, bununla bağlı Böhran Vəziyyətlərində İdarəetmə Mərkəzinə məlumat verilib. 

Hadisə yerinə cəlb olunan Dövlət Yanğından Mühafizə Xidmətinin müvafiq xilasetmə qüvvələri sürücü və 1 nəfər sərnişinin (şəxsiyyətləri dəqiqləşdirilir) meyitini, yaralı vəziyyətdə olan digər sərnişini deformasiyaya uğrayan nəqliyyat vasitəsindən çıxararaq aidiyyəti üzrə təhvil veriblər.