Hipertoniyanın inkişaf riski uşaqlıqdan başlayır - ARAŞDIRMA

İsveçin Göteborq Universitetinin alimləri  müəyyən ediblər ki, uşaqlıq və yeniyetməlik dövründə artıq çəki yetkinlik dövründə hipertoniyanın (yüksək qan təzyiqi) inkişafı üçün risk faktorudur.

News24.az xəbər verir ki, bu barədə tədqiqatın nəticələri Avropa Obezitenin Tədqiqi Assosiasiyasının EASO saytında təqdim olunub.

Məlumata görə, tədqiqat zamanı alimlər 1948-1968-ci illər arasında doğulmuş 1683 nəfərin çəkisi və sağlamlığı ilə bağlı məlumatları təhlil ediblər. İştirakçıların uşaqlıq və yeniyetməlik dövründə bədən kütləsi indeksini (piylənmə və artıq çəki təsnif etmək üçün istifadə edilən çəki və boyun sadə nisbəti) qiymətləndirmək üçün tədqiqatçılar onların məktəb tibbi qeydlərini və hərbi xidmətə qəbul fiziki xüsusiyyətlərini nəzərdən keçiriblər.

Məlum olub ki, kişilərdə uşaqlıqda bədən kütləsi indeksinin bir vahid artması (normala nisbətən) sistolik qan təzyiqinin 1,30 mmHg artması ilə əlaqələndirilir. Gənclərdə bədən kütləsi indeksi bir vahid artarsa, sistolik və diastolik qan təzyiqi 1,03 mmHg artır. 

Qadınlarda yetkinlik dövründə BKİ-nin bir vahid artması sistolik qan təzyiqinin 0,96 mmHg artmasına səbəb olub. 

Tədqiqatçılar izah etdilər ki, uşaqlıqda və yeniyetməlikdə artıq piylər orqanizmdə iltihabi proseslərə səbəb ola bilər. Bu, yetkinlik dövründə hipertoniya üçün risk faktoru olan damarların zədələnməsinin yığılmasına səbəb ola bilər.

Mehriban Mirzəzadə