Qlobal istiləşmə: Gələcəkdə Azərbaycanda yaşamaq qeyri-mümkün olacaq?

ABŞ-nin Perdyu Universitetinin alimləri müəyyən ediblər ki, bir neçə ildən sonra Qərbi Afrika, Cənubi Asiya və ABŞ-nin Orta Qərbi iqlim dəyişikliyi səbəbindən insan həyatı üçün təhlükəli vəziyyətə gələcək.

Yerli mətbuatın məlumatına görə, alimlərdən ibarət tədqiqat qrupu Yerdəki iqlim dəyişikliyi və istilik dalğaları ilə bağlı informasiyalardan istifadə edərək modelləşdirmə həyata keçirib.

Alimlər belə qənaətə gəliblər ki, bəşəriyyət qarşıdakı illərdə havanın soyuyacağını gözləməməlidir. Temperatur tədricən artacaq və bu da artan rütubətlə birləşərək əksər insanlar üçün çətin və təhlükəli yaşayış şəraiti yaradacaq.

“Qərbi Afrika və Cənubi Asiyanın bəzi hissələri ən həssas bölgələr sırasındadır, çünki bu ərazilər sıx əhalisi və məhdud soyutma qabiliyyətinə malik olması ilə fərqlənir. ABŞ-nin bəzi hissələrində, o cümlədən Orta Qərb bölgəsində də yüksək rütubətli istilər yaşanacaq”, - tədqiqatçılar qeyd ediblər.

Alimlər əlavə edib ki, texnologiyaya çıxışı olan inkişaf etmiş ölkələrin sakinləri istilərə daha rahat tab gətirəcəklər, lakin bu da uzun sürməyəcək.

Ümumdünya Səhiyyə Təşkilatının məlumatına görə, istilər hazırda dünyada 489 illik ölümə səbəb olur.

Lakin iqlim və sağlamlığın pisləşməsi arasında həmişə açıq-aşkar əlaqənin olmaması səbəbindən ölənlərin dəqiq sayı daha yüksək ola bilər.

Maraqlıdır, Azərbaycan da bu ölkələr sırasına aid edilə bilər?

News24.az xəbər verir ki, məsələ ilə bağlı "Cebheinfo.az"-a açıqlamasında meteoroloq Cavidan Əliyev bildirib ki, dünya üzrə isti dalğaların bu gedişlə daha da sürətlənəcəyi gözlənilir:

"Qlobal istiləşmə isə ölkəmizdən yan keçməyib, temperatur 0,5-0,8 dərəcə aralığında artıb. Lakin dünya ilə müqayisədə bu göstərici çox təhlükəli hesab edilməsə də, bu gedişlə ölkəmizdə temperatur artacaq və anomal hadisələrin (daşqınların, quraqlıqların) sayı çoxalacaq".