"Qarabağ"-"Lion" oyunu ilə bağlı PROQNOZ: "Komandamızı çətin oyun gözləyir"

Bu gün UEFA Avropa Liqasında 5-ci turun oyunları keçiriləcək. Azərbaycanı bu turnirdə təmsil edən "Qarabağ" Bakıda "Lion"la (Fransa) üz-üzə gələcək. 

İdman jurnalisti Daşqın Əziz bugünkü oyunla bağlı fikirlərini News24.az-la bölüşüb. O, açıqlamasında bildirib ki, "Qarabağ" axşamki görüşə böyük motivasiya ilə çıxacaq.

"Çox gərgin matç olacaq. "Qarabağ"ın "Bodo-Qlimt" üzərində səfər qələbəsindən sonra motivasiyası artıb. Budəfəki rəqib isə Fransanın adlı-sanlı "Lion"udur. Düzdür, rəqib komandada maliyyə sıxıntıları yaşanır, hətta bəzi futbolçuların klubu tərk edəcəyi barədə məlumatlar yayılıb. Amma "Lion" Fransa çempionatında qeyri-stabil çıxış etsə də, Avropa Liqasında tam fərqli nəticələrə imza atır. Buna görə də axşam təmsilçimizi çətin oyun gözləyir. Matçla bağlı proqnoza gəldikdə isə məncə, "Lion" 2:1 hesabıyla qalib gələcək", - deyə o bildirib.

Qeyd edək ki, Tofiq Bəhramov adına Respublika stadionunda keçiriləcək qarşılaşma saat 21:45-də başlayacaq.

Ağa Dadaşzadə