SEPAH generalı öldürüldü – Müxaliflərin hücumları genişləndi

Suriyanın Hələb və İdlib əyalətlərində Bəşər Əsəd rejimi ilə rejim əleyhdarı qruplar arasında qarşıdurmalar davam edir.

News24.az xəbər verir ki, Rusiyanın hava hücumları və Suriya rejiminin Türkiyəyə bitişik İdlib bölgəsinə qurudan hücumları son zamanlar intensivləşib.

Rusiya, Suriya rejimi qüvvələri və milis qrupları ölkənin şimalında yerləşən İdlibdə müxaliflərin mümkün əməliyyatının qarşısını almaq üçün hərbi imkanlarına qarşı hücumlar həyata keçirdiklərini iddia edib.

Ancaq bölgədə artan mülki itkilər bu iddiaların əksini ortaya qoyub və gərginlik daha da artıb. Hələb və İdlib əyalətlərində Bəşər Əsəd rejimi ilə rejim əleyhdarı Heyət Təhrir Şam (HTŞ) silahlı qruplaşması arasında üç gündür qarşıdurmalar davam edir. Qarşıdurmalarda 39-u rejim əsgəri, 44-ü müxalifətçi olmaqla 100-ə yaxın adam öldürülüb.

Suriya rejimi qüvvələrinin və silahlı birləşmələrin İdlibə son hücumları nəticəsində 40-dan çox dinc sakin həyatını itirib, 100-dən çox insan isə yaralanıb. Quran kursuna edilən hücumda 3 uşaq ölüb, bəziləri ağır olmaqla onlarla uşaq yaralanıb.

İdlib bölgəsindəki bəzi qruplar Suriya rejimi qüvvələri və milis qruplarını cəbhə xəttindən çıxarmaq üçün əməliyyata başlama ehtimalını dilə gətirib. Bu əməliyyat rejim qüvvələrinin bölgədən çıxarılması və mülki əhalinin zərər görməsinin qarşısını almaq üçün planlaşdırılıb. Türkiyə gərginliyi artırmamaq üçün müxalifətin əməliyyatlarını əngəlləyib. Lakin son hücumlardan sonra Suriyalı müxalif qruplar Hələb istiqamətində atışmaların gəldiyi bölgələrə qarşı məhdud əməliyyatlara başlayıb.

Əvvəlcə məhdud olaraq planlaşdırılan bu əməliyyat rejim ünsürləri olduqları bölgələrdən çəkilməyə başladıqca genişlənib. Hələbə doğru irəliləyən bu əməliyyatın əsas məqsədinin 2019-cu ildə razılaşdırılmış İdlib Gərginlik Azaltma Bölgəsi (IGAB) sərhədlərinə çatmaq olduğu müəyyən edilib. Türkiyə, İran və Rusiya arasında 2019-cu ildə razılaşdırılmış sərhədlərin şərq bölgəsində əməliyyat davam edir. Rejim əleyhdarları Hələb şəhərinin kənarına bir kilometrə qədər yaxınlaşaraq 400 kvadrat kilometr ərazini nəzarətə götürüblər. Rejim əleyhdarı qruplar da günün ilk saatlarında Hələb Neyrap Hərbi Hava Limanına pilotsuz təyyarələrlə hücum edərək 1 helikopteri məhv edib.

Yerli mənbələrin məlumatına görə, Hələbin qərbində Suriya müxalifətinin həyata keçirdiyi hücumda İran İnqilab Keşikçiləri Ordusunun (SEPAH) komandirlərindən briqada generalı Keyumers Purhaşiminin öldürüldüyü bildirilib. SEPAH-a yaxınlığı ilə tanınan yarı rəsmi Tesnim Xəbər Agentliyinin xəbərinə görə, “hərbi müşavir” olaraq xarakterizə edilən briqada generalı Purhaşimi Hələb yaxınlığında Suriya müxalifətinin hücumu nəticəsində öldürülüb. Qarşıdurmalarda rejim əleyhdarı qruplar Əsəd rejiminin nəzarətində olan ümumilikdə 56 kəndi ələ keçirib. Silahlı qruplar dünən Hələbin qərbində 32 kənd və məntəqəni nəzarətə götürüb, daha 24 kəndi ələ keçirib. Bölgələrdə Əsəd rejiminə məxsus ağır silahlar və hərbi maşınlar da ələ keçirilib.

Qarşıdurmalarda çoxlu rejim əsgəri həlak olarkən, HTŞ onlarla rejim əsgərini də əsir götürüb. Qarşıdurmalardan qaçan 10 minə yaxın mülki şəxs İdlib çölünə sığınıb. Rusiyaya məxsus döyüş təyyarələrinin Suriyanın şimalında Hələb vilayətinin qərbindəki Daret İzze və Etarib rayonlarına təşkil etdiyi hücumda 12 mülki şəxs ölüb, ən azı 30 mülki şəxs yaralanıb.

Aynurə