Akademik Musiqili Teatr Şəkidə Beynəlxalq Teatr Festivalında iştirak edəcək - FOTOLAR

Dekabrın 1-5-də Şəkidə milli peşəkar teatrın yaranmasının 145 illik yubileyi münasibətilə IV Beynəlxalq Teatr Festivalı keçiriləcək.

News24.az xəbər verir ki, Azərbaycan Dövlət Akademik Musiqili Teatrı İran, Özbəkistan, Qazaxıstan, eləcə də ölkəmizin bir sıra teatr kollektivlərinin iştirak edəcəyi bu beynəlxalq tədbirə özbək yazıçısı İbrahim Sadıqovun “Molla Nəsrəddinin beş arvadı” (quruluşçu rejissor Əməkdar incəsənət xadimi Əsgər Əsgərov) iki hissəli komediyası ilə qatılacaq. Səfərin Mədəniyyət Nazirliyinin təşkilatçılığı və maliyyə dəstəyi ilə regionlara təşkil olunan qastrol səfərləri proqramına uyğun olaraq həyata keçirilməsi nəzərdə tutulub.   

2 dekabr saat 17:00-da Şəki Dövlət Dram Teatrının səhnəsində nümayiş etdiriləcək tamaşada rolları Əməkdar artistlər Əzizağa Əzizov, İqrar Salamov, Prezident mükafatçısı Mehriban Zaliyeva, aktyorlar Gülnarə Abdullayeva, Ülviyyə Əliyeva, Gülcahan Salamova, Gülnarə Əzizova, Şaban Cəfərov, Əliməmməd Novruzov,  Fərid Rzayev, Cəbrayıl Cəbrayılov oynayacaqlar.

Qeyd edək ki, səhnə əsərinin rəssamı Əməkdar rəssam Nabat Səmədova, quruluşçu baletmeysterləri Əməkdar artistlər Zakir və Yelena Ağayevlər, rejissor assistenti Tamilla Aslanovadır.