Alıcılar azalsa da, mənzillər bahalaşır – Səbəb nədir?

Bu ilin III rübündə mənzil bazarında qiymət indeksi, II rüblə müqayisədə, 3.8% artıb. Bu barədə Mərkəzi Bankın “Pul siyasəti icmalı”məlumat yayıb. İlkin mənzil bazarında (təmirsiz ev) 4.3%, təkrar mənzil (təmirli ev) bazarında isə qiymətlər 3.7% artıb.

Əmlak məsələləri üzrə ekspert Ramil Osmanlı "Yeni Sabah"a bildirib ki, mənzil bazarında qiymət artımı hələ də davam edir:

“Bu sahədə fəaliyyət göstərən ayrı-ayrı qurumların açıqladığı rəqəmlər arasında müəyyən fərqlər müşahidə olunur. Həmin rəqəmlər onu deməyə əsas verir ki, Azərbaycanda nə qədər ki, vahid bazar indeqatorları mövcud deyil, bazarın araşdırılması qeyri-peşəkar şəkildə keçirilir. Amma bazar üzrə ümumi qiymət artımlarının baş verdiyini təsdiq edə bilərəm. Həqiqətən də, daşınmaz əmlak bazarının mənzil seqmentində əvvəlki illərlə müqayisədə bu il də qiymət artımları davam edir”. 

Ekspertin fikrincə, mənzil satışı bazarında alıcılıq faizləri də xeyli aşağı düşüb:

“Əvvəlki illərlə müqayisədə bu il baş verən qiymət artımları nisbi xarakter daşıyıb. Xüsusən, bu il üzrə baş verən artımların təhlili göstərir ki, ola bilsin ki, ilin sonları üzrə göstəricilərdə bahalaşma birrəqəmli göstəricilərlə ifadə olunsun. Amma bütövlükdə qiymət artımları var. Bu artımların nisbi olmasının əsas səbəbi isə bazarda əvvəlki 2 illə müqayisədə alıcılıq qabiliyyətinin azalması və tələbin aşağı düşməsidir. Ötən illərdən fərqli olaraq, bazara pul axınlarında azalmalar var. Bu da onu deməyə əsas verir ki, nə qədər ki, Azərbaycanın mənzil bazarı investorların nəzarətində olacaq, təklif çoxalsa da qiymətlər ucuzlaşmayacaq”.