Yeni kəşf! qidanı internetdən yükləmək mümkün olacaq

Qidanı internetdən yükləmək və 3D-printerdə çapa vermək yüz il sonra mümkün olacaq. Bu, Böyük Britaniyadakı Vestminster Universiteti alimlərinin iddiasıdır. Həmin alimlər yaxın yüzillikdə texnologiyaların inkişafına dair tədqiqat aparıblar.

News24.az “Utro.ru” saytına istinadən xəbər verir ki, britaniyalı alimləri belə bir proqnoz verməyə “Natural Machines” şirkətinin sifarişi olub. Bu şirkət ərzaq məhsullarını çap edə biləcək, dəyəri min dollardan artıq olmayan 3D-printerin yaradılması üzərində işləyir. Analoji tərzdə insanlar mebel, müxtəlif məişət əşyaları, paltar və ayaqqabı və s. alışı məsələlərini də həll edə biləcəklər.

Nəqliyyat vasitəsi kimi pilotsuz aparatlardan istifadə oluna bilər. Bu cihazlar yükləri və çeşidli sifarişləri ünvanına çatdıracaq. İnşaat və memarlıqda mövcud olacaq yeni texnologiyalar isə su və yer altında bütöv şəhərlər salmağa imkan verəcək. Bu da, öz növbəsində, sualtı və yeraltı nəqliyyat növlərinin inkişafına səbəb olacaq.

Kosmosun fəthi sahəsində isə futuroloqlar Mars və Ayın məskunlaşdırılacağını, habelə Günəş sistemindəki digər planet və peyklərin fəthi ilə onlara kommersiya xarakterli kosmik uçuşların inkişafını öncə görürlər.