Azərbaycanda kişi arvadını öldürdüyünü yeddi il sonra etiraf etdi - Video

Yeddi il əvvəl törətdiyi qətl Nazim Cəfərovu rahat yaşamağa qoymadı, nəhayət əməlini etiraf etdi. Canına qəsd etdiyi isə 2 övladının anası Kamilə Cəfərovadır. 

News24.az Baku.Tv-yə xəbər verir ki, Nazim Kamilə ilə 2000-ci ildə rəsmi qaydada ailə həyatı qurub. Bir müddət Cəlilabad rayonunda yaşadıqdan sonra, Nazim Qobustan qəsəbəsində özünə ev tikib, ailəsini və övladlarını götürüb, Bakıya gətirib. Aralarında tez-tez söz-söhbətlər olduğundan ərlə arvad arasında şəxsi münasibətlər pozulub. İstintaqa ifadəsi zamanı Nazim həmin vaxtlar taksi fəaliyyəti göstərdiyindən günün çox hissəsini evdə olmadığını, Kamilənin kənar şəxslərlə danışması və görüşməsindən şübhələndiyini, bir neçə dəfə başqa kişilərlə söhbət etdiyini gördüyünü bildirib.

Kamilə artıq Qobustanda yaşamaq istəməyərək, şəhərə köçüb işləmək istədiyini bildirəndə, Nazim yaranan mübahisələrə son qoymaq üçün onunla razılaşır. Səbail rayonu, 20-ci sahə adlanan ərazidə kirayə ev tutur.

Özü isə Qobustanda, tikintidə fəhlə işlədiyindən, oradakı evində qalır. Təxminən 10 gün sonra ailəsinə baş çəkmək üçün kirayə tutduğu evə yollananda ev sahibi Kamilənin uşaqları da götürüb çıxıb getdiyini deyir. Məktəb çıxışında uşaqlarını izləyən Nazim onların yaxınlıqdakı bir binaya girdiklərini görür.

Bir gün ora gedir, evdə adam olmadığından pilləkəndə oturub gözləyir. Kamilə evə gələndə onu görür və hay-küy salır. Bundan sonra Kamiləni 2 dəfə Qobustanda gördüyünü deyən Nazim yoldaşından bura niyə gəldiyini maraqlananda qadının onun üstünə qışqırdığını bildirir. Onların sonuncu görüşü isə 2012-ci ilin dekabrın 7-də baş tutur. Belə ki, Kamilə Nazimə zəng edərək, Qobustana gəldiyini və görüşmək istədiyini bildirir.

Nazim yoldaşı ilə evlərinin yanında görüşür. Söhbət edə-edə Nazimin stansiyanın yaxınlığında aldığı torpaq sahəsinə doğru gedirlər. Qadın Nazimdən torpağı satıb, pulu ona verməyi tələb edərək, onu alçaldıcı sözlərlə təhqir edir.

Mübahisə zamanı Nazim Kamiləni sinəsindən tutub itələyir. Bu vaxt qadın əl çantasından bıçaq çıxarır. Nazim isə bıçağı onun əlindən alaraq döş qəfəsindən bir zərbə endirir. Qadın yerə yıxılır və təxminən 1 dəqiqədən sonra hərəkətsiz vəziyyətdə qalır. Nazim qadının əllərindən tutaraq sürüyür, qamışlıqda çirkab suların axdığı kanala doğru gətirib, meyiti dəmir borunun içinə qoyur. O, əl çantasından mobil telefonunu və şəxsiyyət vəsiqəsini götürərək, çantanı və bıçağı qamışlığa atır.

Səhəri gün həmin ünvandan uşaqlarını götürərək, atasının evinə aparır. Bir müddət mobil telefonu və nömrəni özündə saxlayıb, mərhumun şəxsiyyət vəsiqəsini yandırır. Özü Kamilənin atasına və qardaşlarına zəng edib, yoldaşının 2 uşağı qoyub, çıxıb getdiyini deyir. Kamilənin valideynləri ilə birlikdə 8-ci Polis Bölməsinə gedərək, arvadının evdən çıxıb bir daha geri qayıtmaması barədə ərizə verirlər.

Nazim daha sonralar 3 dəfə həmin yerə gedir və meyitin orada olduğunu görür. 2013-cü ilin noyabrın 20-də qadının meyiti çirkabın axdığı kanalda çürümüş vəziyyətdə aşkar edilir. Həmin vaxt meyitin şəxsiyyətini müəyyən etmək mümkün olmdığından, Kamilə Cəfərova kimsəsizlər qəbirstanlığında dəfn olunur. Nazimi vaxtaşırı bir neçə dəfə 8-ci bölməyə çağırıb, sorğu-sual edirlər.

Axırıncı dəfə 2019-cu il fevralın 20-də bölməyə çağırılan Nazim inzibati qayda pozduğuna görə barəsində Səbail rayon Məhkəməsinin qərarı ilə inzibati həbs seçilir. Həbsdə olanda, müəssisənin rəisi onunla söhbət aparır.

Nəhayət, Nazim illər öncə arvadını öldürüb, meyitini dəmiryol xəttinin yanında, dəmir borunun içinə atdığını etiraf edir. Faktla bağlı Qaradağ rayon prokurorluğunda cinayət işi başlanılır.

Məhkəmə prosesində Nazim Cəfərov ittiham üzrə özünü təqsirli bilir. Zərərçəkmiş şəxsin hüquqi varisi nəvələrinə görə Nazimi bağışladığını, ona qarşı şikayəti olmadığını qeyd edir. Bakı Ağır Cinayətlər Məhkəməsinin hökmü ilə Nazim Cəfərov Cinayət Məcəlləsinin 120.1-ci qəsdən adam öldürmə maddəsi ilə təqsirli bilinərək 8 il müddətinə azadlıqdan məhrum olunur.