Yanvar-mart aylarında 421 yol qəzası baş verib, 181 ÖLÜ, 378 YARALI

Azərbaycan Respublikasının Dövlət Statistika Komitəsi 2020-ci ilin yanvar-mart aylarında avtomobil yollarında baş vermiş yol-nəqliyyat hadisələrinin statistikası açıqlayıb.

News24.az xəbər verir ki, statistikaya görə, 2020-ci ilin yanvar-mart aylarında 421 və ya 2019-cu ilin müvafiq dövrü ilə müqayisədə 12,6 faiz çox yol-nəqliyyat hadisəsi baş verib, bu hadisələr nəticəsində zərər çəkən şəxslərin sayı 15,5 faiz artaraq 559 nəfər olub.

Onlardan 181-i həlak olub, 378-i isə yaralanıb. Hadisələrin 35,4 faizi gündüz, 39,4 faizi gecə, 25,2 faizi isə toran vaxtı baş verib, 30,9 faizi həftənin şənbə və bazar günlərinə təsadüf edib.

Yol-nəqliyyat hadisələrinin 88,8 faizi yaşayış məntəqələrində baş vermiş, bu hadisələr nəticəsində həlak olanların sayı ötən ilin müvafiq dövrünə nisbətən 33,0 faiz artaraq 133 nəfər, yaralananların sayı 5,4 faiz artaraq 350 nəfər olub.

Yol-nəqliyyat hadisələrinin və zərərçəkənlərin sayı

Göstəricinin adı	2020-ci ilin yanvar-mart aylarında	2019-cu ilin yanvar-mart aylarına nisbətən, faizlə
Bütün yol-nəqliyyat hadisələri – cəmi	421	112,6
Məkanına görə:
magistral avtomobil yollarında	47	117,5
yaşayış məntəqələrində	374	112
İşıqlılıq vəziyyətinə görə:
gündüz vaxtı	149	92
toran vaxtı	106	143,2
gecə vaxtı	166	120,3
Yol örtüyünün vəziyyətinə görə:
quru yol örtüyü	390	112,1
digər (yaş, buz və s.)	31	119,2
Zərərçəkənlərin sayı, nəfər	559	115,5
həlak olanlar	181	127,5
yaralananlar	378	110,5

Bütün yol-nəqliyyat hadisələrinin 47,3 faizi nəqliyyat vasitələrinin və piyadaların, 34,7 faizi bir neçə nəqliyyat vasitəsinin, 18,0 faizi bir nəqliyyat vasitəsinin iştirakı ilə baş verib.