14 yaşı var, amma 1-ci sinifdə oxuyur - VİDEO

Əbdürrəhman Həsənov 242 nömrəli tam orta məktəbin birinci sinif şagirdidir. 14 yaşı olan bu oğlanı həmyaşıdlarından fərqləndirən cəhət onun indiyə kimi yazıb oxuma bilməməsidir. O, məktəbə gec getməsini valideynlərinin qeydiyyat problemi ilə əlaqələndirib. Dediyinə görə, onun və qardaşının sənədləri vaxtında hazır olmadığından illərlə məktəb həsrəti çəkiblər. 


"Ailədə 3 qardaş, bir bacıyıq. Məktəbə gec getməyimin səbəbi anamın Gürcüstan qeydiyyatında olması idi. Keçən ilin sentyabr-oktyabr aylarında xəbər verdilər ki, bizə vətəndaşlıq verirlər, 3-4 ay sonra mən məktəbə gəldim. Digər qardaşım da mənimlə birgə birinci sinifdə təhsil alır, 2009-cu il təvəllüdlüdür. Böyük qardaşm məktəbi bitirib, bacım isə sonuncu sinifdədir. Anam altıncı sinifə qədər oxuyub. Atam isə 11 il təhsil alıb. Anam evdar qadındır, atam məktəbdə gözətçi işləyir”, - məktəbli oğlan deyib.


 
Əbdürrəhman məktəbə böyük həvəslə gəlir. Dərs bitdikdən sonra məktəbdən getmək istəmir: "Oxumağı bilirdim, amma yazmağı çox pis bacarırdım. Bacım öyrətmişdi. Ancaq daim istifadə etmədiyimə görə yadımdan çıxırdı. Sonra daha yaxşı yazmağı öyrəndim. Bura gələnə qədər oynayırdım, gəzirdim, hansısa bir işlə məşğul olmurdum. Məktəbdə hər gün yeni şeylər öyrənirəm. Təkrarlayırıq. Yeni hərflər keçirik. İndi "T" hərfində və 5 rəqəmindəyik”.


 
Əbdürrəhmanın ibtidai sinif müəlliməsi Şərqiyyə Dadaşovanın sözlərinə görə, o, 35 il ərzində ilk dəfə belə şagirdlə rastlaşıb: "Əvvəl çox zəif idi. Yazı yazanda əlləri əsirdi. Bir ay keçməsinə baxmayaraq, irəliləyiş var, indi yaxşı oxuyur. Uşağın savadı çox olsa, gələcəkdə bir sinif yuxarı keçə bilər. Hər gün iki saat dərs keçirik. Saat 8-dən 10-a kimi məşğul oluram. Bir gündə hamısını öyrənmək istəyir. Çox həvəslidir. Qardaşı ona nisbətən zəifdir”. 


 
Əbdürrəhmanın məqsədi orta məktəbi başa vurduqdan sonra ali təhsil almaqdır. O, gələcəkdə polis olmağı arzulayır.
//azvizion