Energetika Nazirliyində növbəti kollegiya iclası keçirildi

Energetika naziri Pərviz Şahbazovun sədrliyi, nazirliyin struktur bölmələri və tabeliyindəki qurumların iştirakı ilə videokonfrans formatında növbəti kollegiya iclası keçirilib. İclasda "Enerji resurslarından səmərəli istifadə və enerji effektivliyi haqqında" və “Elektrik enerjisi istehsalında bərpa olunan enerji mənbələrindən istifadə haqqında” Azərbaycan Respublikasının qanunlarından irəli gələn alt qanunvericilik aktlarının hazırlanması istiqamətində müzakirələr aparılıb.

Nazirlikdən News24.az-a verilən məlumata görə, iclası açan kollegiya sədri Pərviz Şahbazov energetika sektorunun inkişafı, bərpa olunan enerji və enerji səmərəliliyi sahəsində Azərbaycan Respublikasının Prezidenti cənab İlham Əliyev tərəfindən mühüm vəzifələrin irəli sürüldüyünü bildirib, bu istiqamətdə müəyyən olunmuş vəzifələrin icrasına diqqət çəkib. İclasın gündəliyinə bərpa olunan enerji mənbələri və enerji effektivliyi sahəsində qəbul edilmiş iki yeni qanunvericilik aktının tətbiqi barədə Azərbaycan Respublikası Prezidentinin və Nazirlər Kabinetinin müvafiq fərman və sərəncamlarından irəli gələn tapşırıqların icrası üzrə görülmüş işlərin müzakirəsinin daxil edildiyi bildirilib. Qeyd olunub ki, Energetika Nazirliyinin müvafiq əmrləri ilə verilmiş bu tapşırıqların icrasının təmin edilməsi məqsədilə iki tədbirlər planı təsdiq edilib və ümumilikdə 21 işçi qrupu yaradılıb.

Sonra Elektroenergetika və enerji səmərəliliyi şöbəsinin müdiri Ələsgər Həsənovun və digər həmməruzəçilərin "Enerji resurslarından səmərəli istifadə və enerji effektivliyi haqqında" Azərbaycan Respublikasının Qanunundan irəli gələn alt qanunvericilik aktlarının hazırlanması istiqamətində görülmüş tədbirlərə dair məruzələri dinlənilib. Bildirilib ki, bu istiqamətdə 16 işçi qrupu yaradılıb və 13 qaydanın hazırlanması istiqamətində beynəlxalq təcrübənin öyrənilməsi, o cümlədən  Enerji effektivliyi fondunun yaradılması üzrə işlər davam etdirilir. Eyni zamanda, beynəlxalq təşkilatlar və maliyyə institutları ilə müvafiq istiqamətlər üzrə əməkdaşlıq əlaqələri haqqında məlumat verilib. 

İclasda “Elektrik enerjisi istehsalında bərpa olunan enerji mənbələrindən istifadə haqqında” Azərbaycan Respublikasının Qanunundan irəli gələn ikinci dərəcəli qanunvericilik aktlarının hazırlanmasının cari vəziyyəti haqqında məlumat verən Bərpa Olunan Enerji Mənbələri Dövlət Agentliyinin direktoru Təbriz Əmmayev bu istiqamətdə tədbirlər planının icrası məqsədilə 5 işçi qrupunun yaradıldığını diqqətə çatdırıb. Bərpa olunan enerji mənbələri ərazisində elektrik enerjisi istehsalçısının seçilməsi və aktiv istehlakçıların dəstəklənməsi mexanizminin tətbiqinə dair qaydaların layihələrinin beynəlxalq məsləhətçi şirkət cəlb edilməklə hazırlandığı bildirilib. Bərpa olunan enerji mənbələri üzrə informasiya sisteminin əsasnaməsinin və bərpa olunan enerji mənbələri hesabına istehsal edilmiş elektrik enerjisinə mənbə sertifikatının verilməsi qaydasının hazırlanmaqda olduğu diqqətə çatdırılıb.

Kollegiya iclasında, həmçinin Azərbaycan Respublikasının Qanunlarının, Azərbaycan Respublikası Prezidentinin aktlarının, Azərbaycan Respublikası Nazirlər Kabinetinin və Energetika Nazirliyinin normativ hüquqi aktlarının yeni qəbul olunmuş qanunlara uyğunlaşdırılmasına dair təkliflərin hazırlanması istiqamətində atılmış addımlar haqqında məlumat verilib.

İclasın sonunda kollegiyanın sədri Pərviz Şahbazov görüləcək işlər və qarşıda duran vəzifələrin icrası, sənədlərin icra vəziyyətinin və müddətinin nəzarətdə saxlanılması, icra intizamına riayət edilməsi ilə bağlı nazirliyin struktur bölmələrinə və tabeli qurumlara müvafiq tapşırıqlar verib.