Baş Prokurorluqda Zəfər Günü ilə bağlı tədbir keçirildi - FOTO

8 Noyabr - Zəfər Günü münasibətilə Baş Prokurorluğun kollektivi noyabrın 5-də I və II Şəhidlər xiyabanına gələrək Azərbaycanın müstəqilliyi və ərazi bütövlüyü uğrunda şəhid olan qəhrəman Vətən övladlarının xatirəsinə dərin ehtiramlarını bildirib, məzarları üzərinə gül dəstələri qoyub, “Əbədi məşəl” abidəsini ziyarət ediblər.

Bu barədə News24.az-a Baş Prokurorluğun Mətbuat Xidmətindən məlumat verilib.

Daha sonra Baş Prokurorluqda 8 Noyabr - Zəfər Gününə həsr olunan tədbir keçirilib.

Əvvəl şəhid olan qəhrəman vətən övladlarının əziz xatirəsi bir dəqiqəlik sükutla yad edildikdən sonra Baş prokuror Kamran Əliyev prokurorluq orqanlarında çalışan bütün prokurorluq əməkdaşlarını və xalqımızı 8 Noyabr - Zəfər Günü münasibətilə təbrik edib.

Tədbirdə çıxış edən Kamran Əliyev bildirib ki, Ermənistan silahlı qüvvələrinin 27 sentyabr 2020-ci il tarixdə təcavüzkar təxribatlara yenidən başlamasına cavab olaraq Ali Baş Komandan İlham Əliyevin müdrik rəhbərliyi ilə Ordumuz torpaqlarımızın işğaldan azad edilməsi, Ermənistanın sülhə məcbur edilməsi, məcburi köçkünlərin öz doğma torpaqlarına qayıtması və ədalətin bərpası üçün Vətən müharibəsinə başladı. Bu müqəddəs amal uğrunda bütün Azərbaycan xalqı səfərbər və həmrəy oldu.

K.Əliyev qeyd edib ki, 44 gün sürən hərbi əməliyyatlar nəticəsində müzəffər Azərbaycan Ordusu işğal altında olan ərazilərimizi azad etməklə yanaşı Ermənistanı öz məğlubiyyətini etiraf etməsinə və kapitulyasiya aktını imzalamasına məcbur edib.

Tədbirdə həmçinin, 44 günlük Vətən müharibəsi zamanı xidməti vəzifəsini yerinə yetirərkən Ermənistan silahlı qüvvələri tərəfindən atılan raket zərbələri nəticəsində xəsarət alan, Prezident İlham Əliyevin 30 dekabr 2020-ci il tarixli sərəncamı ilə 3-cü dərəcəli “Vətənə xidmətə görə” ordeni ilə təltif edilən Baş Prokuror yanında Korrupsiyaya qarşı Mübarizə Baş İdarəsinin əməkdaşı Ozal Həsənov, eləcə də müharibə zamanı dinc mülki əhalimizə qarşı törədilən cinayətlərin istintaqının aparılmasında fəal iştirak edən Baş Prokurorluğun İstintaq idarəsinin müstəntiqi Orxan Rzayevin çıxışları dinlənilib.

Sonda isə 44 günlük Vətən müharibəsinə həsr olunan Bakı Media Mərkəzi tərəfindən hazırlanan “Zəfər Meydanı” adlı sənədli film nümayiş etdirilib.