7 məzun Bakı Metropolitenində maşinist oldu

2021-ci ilin iyul ayında başlanmış təlimləri bitirmiş daha 7 məzun Bakı metropolitenində sərnişin qatarlarının maşinisti peşəsinə yiyələnib. 

News24.az xəbər verir ki, bu təlimlərlə bağlı müsabiqəyə ötən ilin fevralında başlanılıb. 

300-ə yaxın müraciət arasında 170 nəfər əsas tələblərə uyğun gələn imtahanlara çağırılıb.  Metropolitenlə bağlı ibtidai biliklər və məntiq testinə qatılan 125 nəfərdən yalnız 35-i məqbul nəticə göstərib. Müsahibə və psixoloji testdən ibarət ikinci mərhələni 16 nəfər keçə bilib. 

Üçüncü kadr komissiyası və tibbi yoxlamadan keçən 10 nəfər nəzəri təlimlərə başlasa da, kursun gedişində 3 müdavim müxtəlif səbəblərdən tədris prosesindən uzaqlaşıb. Nəzəri və praktiki mərhələlərdən uğurla keçən 7 müdavim isə təcrübə müddətini də uğurla keçərək, kadr komissiyası qarşısına çıxıb və metropolitenin maşinisti vəsiqəsini əldə edib. 

Qeyd edək ki, hazırda daha bir kurs da yekunlaşıb. 8 müdavimdən 6-sı normativlərə uyğun olaraq təcrübəyə cəlb olunub. Müdavimlər 7 aya yaxın davam edən kursda kifayət qədər praktiki vərdişlərə yiyələnsələr də, təlimlərdən sonra 2 aya yaxın davam edən yürüşlərdə normativləri yerinə yetriməli, maşinist kimi özlərini doğrultmalı və qatarı sərbəst idarə etmək bacarığını təsdiq etməlidirlər.