Azərbaycan əsgərləri silah daşıyan rus sülhməramlılarını saxladı

Qarabağda Rusiya sülhməramlılarının məsuliyyət zonasında icazəsiz silah daşınması cəhdinin qarşısı alınıb. 

News24.az xəbər verir ki, bu barədə “Minval” nəşri məlumatlı mənbələrə istinadən məlumat yayıb.

Məlumatda bildirilir ki, bu gün saat 17:15-də Azərbaycan ordusunun nəzarət-buraxılış məntəqəsində Rusiya Federasiyası sülhməramlılarının Ağdam vasitəsilə Əsgəran-Ağdərə marşrutu üzrə hərəkət edən 82A zirehli transportyoru və 3 ədəd “Ural” markalı avtomobildən ibarət hərbi kolon yoxlamadan keçirilmək üçün saxlanılıb. 

Baxış zamanı avtomobillərdən birinin yük yerinə yığılan döşəklərin arasında 5 ədəd "Kalaşnikov" avtomatı (AKM) aşkar edilib.

Qaydaların kobud şəkildə pozulmasına - silah və sursatların sənədsiz daşınmasına cavab olaraq, hərbi kolon geriyə qaytarılıb.