Azərbaycan-Yaponiya: diplomatik münasibətlərin 30 ili - XİN - YENİLƏNDİ

Sentyabrın 7-də Xarici İşlər Nazirliyində Azərbaycan və Yaponiya arasında diplomatik münasibətlərin qurulmasının 30-cu ildönümü münasibətilə tədbir və sərgi keçirilib.

Bu barədə News24.az-a XİN-dən məlumat verilib.

Tədbirdə Azərbaycan XİN-in rəhbər heyəti, Milli Məclisin üzvləri, Yaponiyanın Azərbaycandakı Səfirliyinin əməkdaşları, Azərbaycanda fəaliyyət göstərən yapon şirkətlərinin nümayəndələri, elmi-akademik dairələrin nümayəndələri, eləcə də digər qonaqlar iştirak ediblər.

Tədbir hər iki ölkənin dövlət himnlərinin səslənməsi ilə başlayıb.

Tədbirdə çıxış edən Azərbaycanın xarici işlər nazirinin müavini Elnur Məmmədov ümummilli lider Heydər Əliyevin 1998-ci ilin fevral ayında Yaponiyaya tarixi səfərinin iki ölkə arasında yüksək səviyyəli dialoqun qurulmasında mühüm əhəmiyyət kəsb etdiyini diqqətə çatdıraraq, münasibətlərin hazırda uğurla inkişaf etdiyini bildirib. O, cari il ərzində XİN-lərarası siyasi məsləhətləşmələr və hökumətlərarası iqtisadi komissiyanın növbəti iclaslarının uğurla keçirildiyini qeyd edib. İkitərəfli münasibətlərin dərinləşməsində parlamentlərarası əməkdaşlığın rolunu xüsusilə qeyd edən Elnur Məmmədov, ölkələrimiz arasında mövcud qarşılıqlı anlaşma mühitinin, əlaqələrin daha da möhkəmlənməsi, mövcud olan böyük potensialın həyata keçirilməsi üçün münbit şərait yaratdığını ifadə edib. Yaponiya tərəfinin azad olunmuş ərazilərimizin bərpası prosesində iştirakı məmnunluqla vurğulanıb.

Daha sonra çıxış edən Yaponiyanın Azərbaycandakı səfiri Cuniçi Vada iki ölkənin coğrafi olaraq bir-birindən uzaqda yerləşməsinə baxmayaraq, Yaponiya ilə Azərbaycan arasında bu cür mehriban münasibətlərin, qarşılıqlı hörmət və etimadın qurulmasının təqirəlayiq olduğunu bildirib. Ölkələrimiz arasında ikitərəfli münasibətlərin inkişafında qarşılıqlı səfərlərin müstəsna rolu olduğunu qeyd edən səfir Azərbaycan və Yaponiya arasında müxtəlif sahələrdə, o cümlədən iqtisadi, mədəni, humanitar sahələrdə birgə layihələrin həyata keçirildiyini məmnunluqla vurğulayıb.

Tədbirdə həmçinin Azərbaycan və Yaponiya arasında diplomatik münasibətlərin qurulmasının 30 illiyi münasibətilə AzərbaycanPrezidenti İlham Əliyev və Yaponiyanın Baş naziri Fumio Kişida, habelə Azərbaycanın xarici işlər naziri Ceyhun Bayramov və Yaponiya xarici işlər naziri Yoşimasa Hayaşinin məktublarının mübadiləsi baş tutub.

Tədbirin sonunda iştirakçılar Azərbaycan və Yaponiya arasında diplomatik münasibətlərin 30 illiyinə həsr edilmiş sərgi ilə tanış olublar.

xxx

13:15

Azərbaycan və Yaponiya arasında diplomatik münasibətlərin qurulmasının 30 illiyinə həsr olunmuş tədbir keçirilir.

News24.az xəbər verir ki,  bu barədə Azərbaycan Xarici İşlər Nazirliyi "Twitter"də məlumat yayıb.

Qeyd edək ki, Yaponiya Azərbaycanın müstəqilliyini 1991-ci ilin dekabrında tanıyıb. İki ölkə arasında diplomatik əlaqələr isə 1992-ci ilin sentyabrın 7-də qurulub. 1998-ci ildə Azərbaycan Prezidenti Heydər Əliyev ilk dəfə Yaponiyaya səfər edib. Hər iki ölkədə qarşılıqlı şəkildə səfirliklər fəaliyyət göstərir.