ABŞ İrana pulsuz uran təklif etdi, Tehran isə...

ABŞ-nin İrana aşağı zənginləşdirilmiş uran tədarük etməyi təklif etdiyi, lakin Tehranın bu təklifi rədd etdiyi bildirilib.

News24.az xəbər verir ki, hazırda vəziyyət o qədər mürəkkəbləşib ki, bu, ABŞ administrasiyasını münaqişədən bir neçə gün əvvəl İranın xarici işlər naziri Abbas Araqçı tərəfindən irəli sürülmüş təklifə yenidən qayıtmağa məcbur edə bilər.

Araqçı bildirib ki, İran əlində olan bütün nüvə materiallarını Beynəlxalq Atom Enerjisi Agentliyinin nəzarəti altında nüvə reaktorlarında istifadə olunan səviyyəyə qədər emal etməyə hazırdır. Lakin bu materiallar İran ərazisində qalmalı və nəzarət altında saxlanmalıdır.

ABŞ tərəfindən danışıqlarda iştirak edən Cared Kuşner və Stiv Uitkoff bu ideyanı rədd ediblər. Onlar bildiriblər ki, heç bir halda İranın nüvə yanacağı ehtiyatlarına sahib olmasına icazə verilməməlidir.

ABŞ alternativ təklif irəli sürüb. Vaşinqton İrana enerji reaktorları üçün yararlı olan aşağı zənginləşdirilmiş uranı müddətsiz və pulsuz şəkildə təmin etməyə hazır olduğunu bildirib.

Lakin İran XİN rəhbəri bu təklifi də rədd edib. Daha bir görüşün keçirilməsi ehtimalı müzakirə olunsa da, fevralın 28-i səhər saatlarında ABŞ-İsrail hərbi əməliyyatının başlaması səbəbindən bu plan baş tutmayıb. (The New York Times)