İqlim böhranı qum və toz fırtınalarını gücləndirir: 3,8 milyard insan risk altında

İqlim dəyişikliyi nəticəsində artan quraqlıq qlobal miqyasda qum və toz fırtınalarının həm tezliyini, həm də gücünü artırır.

News24.az xəbər verir ki, mütəxəssislərin bildirdiyinə görə, bu təbii hadisələr artıq dünyada təxminən 3,8 milyard insanın həyatına birbaşa və ya dolayı təsir göstərir.

Ümumdünya Səhiyyə Təşkilatının məlumatları Şərqi Aralıq dənizi və ətraf regionlarda bu fırtınaların getdikcə daha geniş yayılmasını göstərir. Səhralaşma və uzunmüddətli quraqlıq isə vəziyyəti daha da ağırlaşdırır.

Mütəxəssislər bildirirlər ki, toz və qum fırtınaları havada PM10 və PM2.5 kimi zərərli hissəciklərin artmasına səbəb olur və bu da ciddi sağlamlıq riskləri yaradır. Ürək-damar xəstəlikləri, astma, xroniki ağciyər xəstəlikləri, hətta meningit və insult kimi ağır fəsadların artdığı qeyd olunur.

Ekspertlərin fikrincə, Afrikanın Səhra bölgəsi, Yaxın Şərq və Ərəbistan yarımadası bu fırtınaların əsas mənbə zonalarıdır. İqlim dəyişikliyi ilə bu ərazilərin təsiri daha geniş regionlara yayılır.

Həkimlər isə risk qruplarına – uşaqlar, yaşlılar və xroniki xəstələrə xüsusilə diqqətli olmağı, fırtına günlərində isə açıq havada qalmaqdan çəkinməyi tövsiyə edirlər.