Putin Bişkekdə Paşinyanla görüşəcək

“Rusiya Prezidenti Vladimir Putin Bişkekdə Ermənistanın Baş naziri Nikol Paşinyanla baş tutacaq görüşdə bu ölkədə Avropa İttifaqına daxil olmaqla bağlı keçirilməsi planlaşdırılan referendumu müzakirə edəcək”.

News24.az xəbər verir ki, bu barədə Rusiya dövlət başçısının mətbuat katibi Dmitri Peskov məlumat verib.

Kreml rəsmisi bildirib ki, Putin bu görüşdən istifadə edərək Rusiyanın mövqeyini və arqumentlərini Paşinyana təqdim edəcək:

“Öz taleyi ilə bağlı qərarı ermənilər özləri verəcəklər. Biz də məhz onlara bunu etməyi – referendum keçirməyi təklif edirik”.

Xatırladaq ki, bundan əvvəl Nikol Paşinyan ölkənin inkişaf proqramında Rusiyanın adını strateji tərəfdaş kimi çəkməkdən imtina edib. Ermənistan hökumət başçısı bu addımını 2020 və 2023-cü illərdə baş verən toqquşmalara Moskvanın verdiyi reaksiya ilə əsaslandırıb.