Netanyahu düşmənlərə cavab zərbəsi endirməyə hazır olduğunu bildirib

İsrailin Baş naziri Binyamin Netanyahu Livandan atılan raket atəşindən sonra fövqəladə iclasda ölkəsinin istənilən düşmənə cavab verməyə hazır olduğunu bildirib.

News24.az xəbər verir ki, bu barədə “The Times of Israel” məlumat yayıb.

“Aramızdakı daxili mübahisələr bizə hər yerdə və istənilən vaxt onlara qarşı hərəkət etməyə mane olmayacaq. İstisnasız olaraq hamımız bunda həmrəyik”, - Baş nazir vurğulayıb.

O qeyd edib ki, israillilər çətin günlərdə “birləşirlər, həmçinin İsrail Müdafiə Ordusu və digər təhlükəsizlik qüvvələrinin ölkəni qorumaq üçün hərəkətlərini dəstəkləyirlər”.

Hökumət başçısı əlavə edib ki, ölkə rəhbərliyi son günlər polislə müsəlman fələstinlilər arasında toqquşmaların baş verdiyi Qüdsdə “Məbəd dağındakı status-kvonu dəyişmək niyyətində deyil”. Netanyahu bildirib ki, hökumət gərginliyin azaldılmasını tələb etsə də, zorakılıq tətbiq edən ekstremistlərə qarşı qətiyyətlə hərəkət edəcək.

Xatırladaq ki, aprelin 6-da qonşu ölkənin ərazisindən İsrailin şimalına - Livanla sərhədə yaxın əraziyə azı 34 raket atılıb. Onlardan 25-i “Dəmir qübbə” raketdən müdafiə sistemi tərəfindən ələ keçirilib. “The Times of Israel” yazıb ki, azı üç nəfər yaralanıb. Nəşr bildirib ki, bu, Livan ərazisindən 2006-cı ildən, İsraillə şiə “Hizbullah” qruplaşması arasında müharibədən sonra ən kütləvi zərbədir. 2021-ci ildə o, ölkənin şimalına 19 raket atıb.