Türkiyə taxıl müqaviləsi ilə bağlı “gizli danışıqlar” aparır?

“Qərb mediasının yazdığı kimi Türkiyə taxıl sazişi üzrə gizli danışıqlar aparmır, Ankaranın təşəbbüsləri və məqsədləri son dərəcə açıqdır”.

News24.az xəbər verir ki, bu barədə Türkiyə prezident administrasiyasındakı mənbə RİA Novosti-yə bir sıra Qərb mediasının Ankaranın guya taxıl müqaviləsi üçün marşrutlarla əlaqədar alternativ danışıqlar aparması ilə bağlı xəbərlərini şərh edərkən bildirib.

“Türkiyə prezidenti Nazirlər Kabinetinin iclasından sonra xalqa müraciətində bildirdi ki, Ankara bütün tərəflərin gözləntilərini nəzərə alaraq taxıl sazişinin bərpası üzərində işləyir. Bizim təşəbbüslərimiz, məqsədlərimiz son dərəcə açıq və aydındır - ehtiyacı olan ölkələrdə ərzaq təhlükəsizliyinə təhlükənin qarşısını almaq. Başqa məqsədlərdə isə Türkiyə tərəfi yoxdur. Məqsədlərimizdən xəbərdar olan bütün tərəflərlə açıq, səmimi dialoq var. Bütün bu yalan xəbərlər Türkiyənin səylərinə kölgə salmaq məqsədi güdür”, - mənbə bildirib.

Taxıl müqaviləsi iyulun 18-də dayandırılıb. Rusiya Federasiyası Türkiyə, Ukrayna və BMT-ni onun uzadılmasına etirazı ilə bağlı məlumatlandırıb. Rusiya prezidenti Vladimir Putin daha əvvəl qeyd edib ki, BMT-nin səylərinə baxmayaraq, Rusiya ilə razılaşmanın şərtləri yerinə yetirilməyib, çünki Qərb ölkələri vədlərinə əməl etmək niyyətində deyillər. Putin dəfələrlə qeyd edib ki, Qərb Ukrayna taxılının böyük hissəsini öz dövlətlərinə ixrac edib və sövdələşmənin əsas məqsədi - ehtiyacı olan ölkələrə, o cümlədən Afrika ölkələrinə taxıl tədarükü heç vaxt həyata keçirilməyib.

Akqabay