“Nəsimi ili” çərçivəsində İstanbulda da tədbir keçirilib - FOTO

İstanbulda Türk Ədəbiyyat Vəqfində “Nəsimi ili” çərçivəsində Azərbaycanın dahi şairi İmadəddin Nəsimi yaradıcılığına həsr olunan tədbir keçirilib.

Mədəniyyət Nazirliyindən News24.az-a verilən məlumata görə, tədbir Azərbaycanın Mədəniyyət Nazirliyi, TÜRKSOY, Azərbaycan Milli Kitabxanası və Türk Ədəbiyyat Vəqfi tərəfindən təşkil olunub.

Çıxışı zamanı tədbirin əhəmiyyətindən söz açan vəqfin rəhbəri Serhat Kabaklı bildirib ki, belə tədbirlərin təşkili iki qardaş ölkənin mədəni yaxınlaşmanın əsasını təşkil edir. TÜRKSOY-un baş katibinin müavini, professor Fırat Purtaş tədbirin türk dünyası üçün çox vacib olduğunu deyib: “Nəsimi yaradıcılığının nəinki türk dünyasında, ümumiyyətlə, bəşəriyyət üçün dərin məna kəsb etdiyini qeyd edib.

Nəsiminin yaradıcılığı millətlər və xalqlar arasında təmas nöqtəsini təşkil edir”. Tədbirin reallaşmasında əməyi keçən hər kəsə minnətdarlığını ifadə edən Azərbaycanın mədəniyyət naziri Əbülfəs Qarayev dəyərlərimizi yaşatmaq baxımından belə tədbirlərin keçirilməsinin əhəmiyyətini vurğulayıb: “İmadəddin Nəsimi yaradıcılığının dünyada tanınması, adının əbədiləşdirilməsi, əsərlərinin araşdırılması və kütləvi şəkildə nəşr edilməsinin ulu öndər Heydər Əliyevin adı ilə bağlıdır.

Nəsiminin 600 illik yubileyi dövlət səviyyəsində məhz 70-ci illərdə ümummilli lider Heydər Əliyevin təşəbbüsü ilə qeyd edilib və tarixdə ilk dəfə UNESCO tərəfindən bir Azərbaycan şairinin yubileyinin layiqincə keçirilməsinə nail olunub. Bu siyasətin Prezident İlham Əliyev tərəfindən uğurla davam etdirilir. Azərbaycanda görkəmli şəxsiyyətlərin adının uca tutulması istiqamətində mühüm addımlar atılır. Şairin yaradıcılığının dünənimiz və bu günümüz üçün birləşdirici dəyərdir.

Bakının mərkəzi rayonlarından birinin onun adını daşıdığını, paytaxtımızda böyük şairin möhtəşəm abidəsinin ucaldığını, adının Azərbaycan Milli Elmlər Akademiyasının Dilçilik İnstitutuna verildiyini xüsusi vurğulayıb. Azərbaycanda Atatürk Mərkəzinin rəhbəri, akademik Nizami Cəfərov Azərbaycan poeziyasının və ədəbi dilinin inkişafında mühüm bir mərhələ təşkil edən Nəsimi yaradıcılığı haqqında məlumat verib: “Akademik şairin yaradıcılığının dilçilik, xüsusilə Azərbaycan türkcəsinin tarixi inkişafını öyrənmək baxımından müstəsna əhəmiyyətə malik olduğunu, böyük mütəfəkkirin 650 il öncə yaşayıb-yaratmasına baxmayaraq, yazdığı əsərlərinin ana dilimizi və bədii sözümüzü zirvələrə qaldırıb.

2017-ci ilin may ayında Parisdə UNESCO-nun baş qərargahında şairin vəfatının 600 illiyinin, 2018-ci ildə Heydər Əliyev Fondunun təşkilatçılığı ilə Bakıda və Şamaxı şəhərlərində, habelə Moskvada Nəsimi, şeir, incəsənət, mənəviyyat Festivalının keçirilməsi və hazırda Prezident İlham Əliyevin müvafiq sərəncamlarına əsasən, bu ilin “Nəsimi ili” elan edilməsini şairin yaradıcılığına göstərilən ehtiramın nəticəsi kimi dəyərləndirib”.

Nəsiminin yaradıcılığından danışan Milli Kitabxananın direktoru Kərim Tahirov şairin Azərbaycanda fəlsəfi poeziyanın əsasını qoyanlardan biri olduğunu, ana dilində gözəl şeirlər yazdığını və buna görə də onun şeirlərinin həmişə dillər əzbəri olduğunu diqqətə çatdırıb: “XX əsrin 70-ci illərində Nəsimini Azərbaycana və dünyaya tanıdan ulu öndər Heydər Əliyev olub. Onun xeyir-duası ilə Azərbaycanda, bir sıra xarici ölkələrdə, hətta UNESCO-da Nəsiminin yubiley tədbirləri keçirilib, onun adı institut, küçə və meydanlara verilib, Bakıda heykəli qoyulub, haqqında bədii film çəkilib”.

Türkiyəli professorlar Esat Harmancı, Nusret Gedik söz sənətinin qiymətli incilərini meydana gətirən bu filosof şairin bütün türk ədəbiyyatının təkmilləşməsinə töhfələr verdiyini, Azərbaycan xalqının çoxəsrlik ənənələrə malik bədii və fəlsəfi fikrində dərin iz qoyduğunu söyləyiblər. Tədbir Nəsimi yaradıcılığının fəlsəfəsinə həsr olunan panel iclası ilə davam edib.

Tədbir tanınmış xanəndə, Əməkdar artist Feyruz Səxavət, tarzən, Əməkdar artist Əliağa Sədiyev və kamança ifaçısı Xəyyam Məmmədovun təqdim etdiyi konsert proqramı ilə davam edib. Sonda tədbir iştirakçıları dahi şairin həyat və yaradıcılığı haqqında yazılmış kitablardan ibarət sərgiyə baxıblar.