Xanəndənin ölümündə təqsirləndirilən şəxsin ibtidai istintaqı yekunlaşıb

Gəncə şəhər sakininin ölümündə ittiham olunan Həbib Əliyevin cinayət işi üzrə ibtidai istintaq yekunlaşıb.

News24.Az xəbər verir ki, onun barəsində toplanan cinayət işinin materialları baxılması üçün Gəncə Ağır Cinayətlər Məhkəməsinə göndərilib.
Cinayət işi hakim Elmin Rüstəmovun icraatına verilib.
Məhkəmənin hazırlıq iclasının vaxtı hələlik açıqlanmayıb.

Qeyd edək ki, ötən il iyulun 31-də Gəncə şəhər sakini, 1994-cü il təvəllüdlü Kamran Yusifov naməlum şəraitdə döyülüb. O, həmin gün ağır kəllə-beyin travması ilə Gəncə Şəhər Mərkəzi Klinikasına yerləşdirilib. Ona tibbi yardım göstərilsə də, avqustun 1-də günorta saatlarında dünyasını dəyişib.
Hadisəni törətməkdə şübhəli bilinən Gəncə şəhər sakini H.Əliyev tutularaq istintaqa təhvil verilib.
İstintaq orqanı tərəfindən H.Əliyevin barəsində Cinayət Məcəlləsilinin 126.3-cü (qəsdən sağlamlığa ağır zərərvurma, ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham elan edilib.

Xatırladaq ki, öldürülən K.Yusifov toylarda xanəndə kimi çıxışlar edib. O, hadisə baş verən günü toydan qayıdarkən döyülüb.