Vaqif Xaçaturyan məhkəmədə Azərbaycan dilində DANIŞDI

Yasamal rayon Məhkəməsinin inzibati binasında Xocalı rayonunun Meşəli kəndində soyqırımı törətməkdə təqsirləndirilən Vaqif Xaçaturyan məhkəmədə işgəncə verdiyi zərərçəkmişi tanıyıb. 

News24.az-ın məlumatına görə, proses başlamazdan əvvəl Meşəli kənd sakinlərindən biri Vaqif Xaçaturyana yaxınlaşaraq onu yaxına çağırıb. Zərərçəkmiş şəxs "Vaqif yaxın gəl" deməklə onu söhbətə dəvət edib. V. Xaçaturyan zərərçəkmişə tərəf yaxın gələrkən zərərçəkmiş şəxsin"Vaqif, tanıdın məni? sualına Xaçaturyan "Hə, tanıdım" deyib. 

Xatırladaq ki, iş üzrə Xocalı rayon İcra Hakimiyyəti və 59 nəfər  zərərçəkmiş qismində tanınıb. 

Qeyd edək ki, Meşəli soyqırımı ilə bağlı beynəlxalq axtarışda olan Ermənistan vətəndaşı Xaçaturyan Vaqif Çerkezoviç bu ilin iyulunda Laçın sərhəd-keçid məntəqəsində saxlanılıb.

Vaqif Xaçatryanın üzv olduğu cinayətkar dəstə 1991-ci ilin dekabr ayında Xocalı rayonunun Meşəli kəndində 25 nəfər azərbaycanlını öldürüb, 14 nəfərə xəsarət yetirib, 358 nəfər azərbaycanlını isə qanuni yaşadıqları yerdən didərgin salıb.

Ona qarşı Cinayət Məcəlləsinin 103-cü (Soyqırımı-hər hansı milli, etnik, irqi və ya dini qrupu, bir qrup kimi bütövlükdə və ya qismən məhv etmək məqsədilə qrup üzvlərini öldürmə, qrup üzvlərinin sağlamlığına ağır zərər vurma və ya onların əqli qabiliyyətinə ciddi zərər vurma) və 107-ci (Əhalini deportasiya etmə və ya məcburi köçürmə-əhalini qanuni yerləşdiyi yerlərdən başqa ölkəyə qovma və ya digər məcburi hərəkətlərlə didərgin salma) maddələri ilə ittiham elan olunub, barəsində həbs qətimkan tədbiri seçilib.

Samir Əli