Prezident İlham Əliyev: “Sabitlik hər bir ölkənin inkişafı üçün əsas şərtdir”

“Ölkəmizin uğurlu inkişafı bundan sonra da təmin ediləcək”. News24.az xəbər verir ki, bunu bu gün Prezident İlham Əliyev Bakının Qaraçuxur qəsəbəsində yenidən qurulan Neftçilər parkında sakinlərlə görüşdə bildirib. 

Dövlət başçısı deyib ki, Azərbaycan xalqı sabitlik şəraitində yaşayır: “Əmin-amanlıq, sabitlik hər bir ölkənin inkişafı üçün əsas şərtdir. Biz indi dünyada baş verən hadisələri görürük, izləyirik. Harada sabitlik pozulur, orada böyük faciələr baş verir. Azərbaycanda sabitliyin mənbəyi Azərbaycan vətəndaşlarıdır, onların fədakarlığıdır, onların bizə göstərdiyi dəstəkdir. Biz bu dəstəyə arxalanaraq böyük işlər görürük. Bu gün Azərbaycan istənilən sahədə - iqtisadi sahədə, sosial məsələlərin həllində, infrastruktur layihələrinin icrasında liderlik göstərir. Nəinki mərkəzdə, qəsəbələrdə də yollar çəkilir, qazlaşdırma gedir, su xətləri çəkilir, belə gözəl parklar salınır”.