Nazir müavini intihara cəhd edən məktəblinin valideynlərini qəbul edib

Bu gün təhsil nazirinin müavini Firudin Qurbanov Bakı şəhəri 109 nömrəli tam orta məktəbin şagirdi F.Ə.-nin valideynlərini Təhsil Nazirliyində qəbul edib. 

Təhsil Nazirliyinin İctimaiyyətlə əlaqələr sektorunun müdiri Cəsarət Valehov News24.az-a verdiyi məlumata görə, Bakı Şəhəri üzrə Təhsil İdarəsinin (BŞTİ) müdiri Rəşad Tağıyevin də iştirak etdiyi qəbulda valideyn dinlənilib, məktəbdə aparılmış xidməti araşdırma barədə məlumat verilib, onları hazırda narahat edən məsələlərlə bağlı müzakirələr aparılıb və Təhsil İdarəsinə müvafiq göstərişlər verilib. 

C.Valehov hazırda şagirdin vəziyyətinin normal olduğunu da bildirdi. 

Xatırladaq ki, aprelin 30-da təxminən saat 20:30 radələrində paytaxtın Nizami rayonundakı 109 nömrəli məktəbin V sinif şagirdinin valideyni məktəb direktoruna övladının evdə valideyninin dərmanını qəbul edərək zəhərləndiyi barədə məlumat verib. 109 nömrəli məktəbin V sinif şagirdinin atası Şamxal Əliyev iddia edib ki, övladı məktəbdə müəllimlərin təzyiqi ilə üzləşdiyinə görə intihara cəhd edib, 6 qutu dərman atıb.
Faktla bağlı cinayət işi başlanıb.