İran İsraildən belə qisas alacaq: SEPAH generalı xəbərdarlıq etdi

İslam İnqilabı Keşikçiləri Korpusunun komandanı general-mayor Hüseyn Səlami sionist rejimə xəbərdarlıq edib ki, İranın HƏMAS rəhbərinin Tehranda öldürülməsinə görə qisas almaq üçün cavab tədbirləri bu dəfə fərqli olacaq.

News24.az "tasnim" agentliyinə istinadən xəbər verir ki, bazar günü İranın Kohgiluyə və Boyer-Əhməd vilayətində keçirilən mədəniyyət konfransında çıxış edən SEPAH komandiri deyib ki, İsrail rejimi “intiqamın acı dadı” ilə üzləşməli olacaq, lakin bu rejimin nə vaxt, harada və necə olacağı qeyri-müəyyəndir. 

General-mayor Səlami İranın bu dəfə mütləq fərqli davranacağını bildirərək, bu tapmacanın sonda həll olunacağını qeyd edib.

O, həmçinin sionist rejim və onun müttəfiqlərinə vur-qaç dövrünün bitdiyini xatırladıb və onlara xəbərdarlıq edib.

Qeyd edək ki, İran prezidentinin andiçmə mərasimində iştirak etmək üçün Tehrana səfər edən HƏMAS-ın siyasi bürosunun rəhbəri İsmayıl Haniyə iyulun 31-i səhər saatlarında İsrailin keçirdiyi əməliyyat nəticəsində şəhid olub.

İslam İnqilabının Rəhbəri Ayətullah Seyid Əli Xamenei İsrail rejimini Haniyənin qətlinə "sərt cavab" verəcəyi barədə xəbərdarlıq edərək, Fələstin müqavimət liderinin qanının qisasını almağı İslam Respublikasının vəzifəsi adlandırıb.

Aqil Qarayev