Almaniyaya getmək istəyənlərin NƏZƏRİNƏ: Quru sərhədlərində..

Almaniyanın bütün quru sərhədlərində tətbiq olunacaq yoxlamalar bu gündən etibarən qüvvəyə minir. Sərhədlərində pasport nəzarəti tətbiq etməyə başlayan Almaniyanın bu qərarı Şengen bölgəsi qonşularını qəzəbləndirib.

Almaniya qeyri-qanuni miqrasiyaya qarşı mübarizəni əsas gətirərək bu gündən doqquz qonşu ölkənin sərhədlərində pasport nəzarətinə başlayıb.

News24.az xəbər verir ki, ölkənin bütün quru sərhədlərində qeyri-qanuni miqrasiya və xaricdən gələn təhdidlərə qarşı sərhəd nəzarəti elan edilib.

Almaniyanın Daxili İşlər Naziri Nensi Faeser bildirib ki, tədbir “transsərhəd cinayətlərlə mübarizə və qeyri-qanuni immiqrasiya nisbətini məhdudlaşdırmaq” məqsədi daşıyır.

Faeser, sərhəd nəzarətinin təhlükəsizlik vəziyyətinə görə tezliyi və müddətinin təyin ediləcəyi "hədəflənmiş bir səy" olacağını ifadə edib.

Qeyd edək ki, bu cür tədbirlərin Aİ-də istisna olması nəzərdə tutulur.

Almaniya Şengen Sazişinə əsasən 29 üzv ölkə arasında daxili sərhəd nəzarətinin ləğv edildiyi, pasport yoxlamalarının yalnız xarici sərhədlərdə və hava limanlarında məcburi olduğu Şengen Bölgəsinin mərkəzindədir.

Tədbirlər həyata keçirildikdən sonra bəzi qonşu ölkələr sərhədlərdə nəqliyyat sıxlığından narahat olduqlarını bildiriblər.

Danimarka polisi sərhədi keçənlərə növbə gözləməmək üçün həmişəkindən tez getməyi tövsiyə edib.

CNN-in məlumatına görə, Polşanın baş naziri Donald Tusk quru sərhədində nəzarətin gücləndirilməsinin Polşa üçün qəbuledilməz olduğunu bəyan edib və Varşavanın bütün təsirlənən ölkələrlə təcili danışıqlar tələb edəcəyini bildirib.

Eyni zamanda, Yunanıstan və Avstriya Almaniyanın rədd etdiyi mühacirləri qəbul etməyəcəklərini açıqlayıb.

Bildirək ki, Almaniyanın doqquz qonşu ölkəsi var. Sentyabrın 16-dan əvvəl Avstriya, İsveçrə, Çexiya və Polşa ilə sərhəd nəzarəti mövcud idi.

Sentyabrın 16-dan etibarən qalan beş ölkə (Fransa, Lüksemburq, Hollandiya, Belçika və Danimarka) ilə sərhədlər nəzarət altında olacaq.

Bu addım Almaniyanın cümə günü Keniya ilə nəzarətli miqrasiya müqaviləsi imzalamasından sonra atılıb. Müqaviləyə əsasən, Berlin öz qapılarını ixtisaslı və yarı ixtisaslı keniyalı işçilərə açacaq.

Günel Məlikzadə