Emin Mahmudovla bağlı sirr açıldı – Bu səbəbdən təcrid olunur

Son zamanlar Emin Mahmudovun həm “Neftçi” PFK-dan, həm də milli komandadan təcrid olunduğu göz önündədir. Hətta ard-arda hər iki klubda kapitanlıq sarğısının ondan alınması da diqqət çəkir. Bundan başqa, sosial şəbəkələrdə yazırlar ki, guya Mahmudovu “Qarabağ” FK-nın baş məşqçisi Qurban Qurbanovun rekordunu yeniləməsin deyə oyundan kənar tutmağa çalışırlar.

Globalinfo.az-a danışan idman jurnalisti Kənan Məstəliyevin fikrincə, Qurban Qurbanovun rekordu elə bir əlçatmaz rekord deyil ki, onu yeniləmək mümkün olmasın.

Onun sözlərinə görə, Azərbaycan futbolunun səviyyəsi elədir ki, bir dənə milli komandanın heyətində 14 top vurmaq çətinləşib:

“Bu, Azərbaycan futbolunun bəlasıdır. Burada nə Emin Mahmudovun, nə Qurban Qurbanovun günahı və rolu var. Emin Mahmudovun bu məqsədlə kənarda saxlanılması məsələsi absurddur, ola bilməz! Əksinə, belə bir iddia Qurban Qurbanova qarşı kampaniya kimi qiymətləndirilə bilər. Çünki Qurbanova qarşı başqa variantlar fikirləşə bilmirlər deyə, məlum iddialar ortaya atılır”.

K.Məstəliyevdə olan məlumata görə, Emin Mahmudovun “Neftçi”də və millidə oynamamasına səbəb ona təklif olunan maaşın azaldılmasına razı olmamasıdır:

“Emin Mahmudovun “Neftçi”də aldığı məvacib çox böyükdür və klub ondan maaşda güzəştə getməsini istəyib. Çünki onlar bu məbləğin böyük olduğunu düşünür, Mahmudov isə təbii olaraq israr edir ki, biz bu məbləğlə müqavilə bağlamışıq və mənim o maaşı almaq ixtiyarım var. Ona görə güzəşt etmir. Bu səbəbdən də klubla futbolçu arasında problemlər, narazılıqlar yaranıb. Nəticədə klub onu bu yolla “yola gətirməyə” çalışır. Emin Mahmudov da mövqeyindən kənara çıxmır, öz fikrində qalır deyə, belə bir vəziyyət yaranır”.

Jurnalist E.Mahmudovun yenidən kapitan olma şansından danışıb:

““Neftçi”yə yeni baş məşqçi – Samir Abbasov gəldi. Ola bilər ki, Emin Mahmudovla razılaşar və onu komandaya kapitan kimi təkrar qaytarar. Emin Mahmudovun performansındakı enişin Qurban Qurbanov rekordu ilə yaxından-uzaqdan heç bir əlaqə yoxdur”.