KRİTİK HƏFTƏ – Zurabişvili postuna könüllü şəkildə ƏLVİDA DEYƏCƏK?

Gürcüstanda dekabrın 14-də keçirilən Prezident seçkilərindən sonra hazırkı Prezident Salome Zurabişvili hakimiyyəti təhvil verməlidir. Bu prosedur qanuna müvafiq olaraq dekabrın 29-da, yeni Prezidentin andiçmə mərasimindən sonra baş tutmalıdır.

Lakin görünən odur ki, Zurabişvili xoşluqla postunu tərk etmək istəmir. Daha doğrusu, o öz hərəkətlərilə belə görüntü yaradır. Belə ki, Zurabişvili son açıqlamalarında parlament seçkisi kimi Prezident seçkisinin nəticələrini də qeyri-legitim hesab edərək, postunu tərk etməyəcəyini bəyan edib.

Bundan əlavə, Gürcüstanın Baş naziri İrakli Kobaxidze brifinqdə Prezident Salome Zurabişviliyə yeni parlament seçkilərinin təyin olunması ideyası ilə bağlı xəbərdarlıq edib. Bu xəbərdarlıq fonunda o, Zurabişvilinin cinayət məsuliyyətinə cəlb oluna biləcəyini də istisna etməyib.

Baş nazir deyib ki, şənbə günü Zurabişvili parlament seçkiləri təyin etmək niyyəti ilə müxalifət və QHT nümayəndələri ilə görüşüb.

Kobaxidzenin sözlərinə görə, Gürcüstanda mövcud qanunvericiliyə əsasən, parlament seçkiləri üç halda təyin edilir: təkrar seçkilər, Mərkəzi Seçki Komissiyası və ya Konstitusiya Məhkəməsi əvvəlki seçkilərin nəticələrini ləğv etdikdə, dörd illik səlahiyyət müddəti başa çatanda və ya parlament hökumətə etimad göstərmədikdə.

Baş nazir vurğulayıb ki, əgər prezident buna baxmayaraq, başqa səbəbə görə yeni parlament seçkiləri təyin etmək qərarına gəlsə, o, buna görə cinayət məsuliyyətinə cəlb olunacaq.

Bu hadisə də onu göstərir ki, Prezidentlik vəzifəsində son günlərini yaşayan Zurabişvili bu postu tərk etməmək üçün bütün vasitələrə əl atmaq niyyətindədir. Bu isə o deməkdir ki, vəzifəsini xoşluqla tərk etməyərək, o, müəyyən gərginlik yaratmaqda, etiraz aksiyasına çıxanları bir qədər də qızışdırmaqda maraqlıdır.

Görəsən, Zurabişvili dekabrın 29-da öz xoşu ilə vəzifəsilə vidalaşacaq, yoxsa buna məcbur ediləcək?

Mövzu ilə bağlı Bizim.Media-ya açıqlamasında siyasi şərhçi Əziz Əlibəyli bildirir ki, Zurabişvili dekabrın 29-dan sonra inzibati qaydada Prezident sarayından çıxarılacaq:

“Burada həlledici məqam Zurabişvilinin qalıb-qalmaması deyil. Həlledici məqam seçkidə qalib gəlməsi idi ki, buna da nail ola bilmədilər. Hökumət əleyhinə Gürcüstanda günlərlə davam edən etiraz mitinqlərindən Zurabişvili və müxalifət hər hansı bir nəticə əldə edə bilmədi. Əsas göstərici də məhz bu idi.

Düşünürəm ki, Salome Zurabişvili dekabrın 29-da Prezident sarayından təcrid olunacaq. Rəsmən, inzibati qaydada çıxarılacaq. Fransa vətəndaşı olduğundan ona qarşı yeri gələr hətta cinayət işi aça, ekstradisiya edə və ölkəyə girişinə qadağa da qoya bilərlər”.