BMTİP və Azərbaycan Hökuməti, Yaşıl İqlim Fondu ilə əməkdaşlıq yollarını müzakirə edir

BMT-nin İnkişaf Proqramı (BMTİP) və Azərbaycan Ekologiya və Təbii Sərvətlər Nazirliyi (ETSN) Yaşıl İqlim Fondu (YİF) ilə gələcək fəaliyyət üçün ölkə proqram sənədinin ilkin versiyasını təqdim etmək məqsədilə maraqlı tərəflərin görüşünü təşkil edib.

News24.az xəbər verir ki, tədbir BMTİP-in həyata keçirdiyi Azərbaycanın Yaşıl İqlim Fondu ilə Əməkdaşlığına Hazırlıq layihəsinin bir hissəsidir. Layihə YİF ilə tərəfdaşlıq şəraitində iqlim dəyişikliyi istiqamətli proqramları həyata keçirmək üçün milli maraqlı tərəflərin bilik və bacarıqlarını artırmaq və milli iqlim məqsədlərinə çatmaq üçün özəl sektorun nizamlı və fəal iştirakına şərait yaratmağı hədəfləyir.

Görüş zamanı layihə mütəxəssisləri və beynəlxalq məsləhətçilər iştirakçılara layihə çərçivəsində görülən fəaliyyətlər, o cümlədən aparılan maarifləndirmə kampaniyaları, potensial layihə təkliflərinə baxılması proseduru, dövlət, özəl və vətəndaş cəmiyyəti təşkilatları üçün bilik və bacarıqların artırılması təşəbbüsləri, eləcə də Yaşıl İqlim Fondu vasitəsilə maliyyələşdirmə imkanları barədə məlumat veriblər.

2015-ci ildə təsis edilmiş Yaşıl İqlim Fondu, Birləşmiş Millətlər Təşkilatının İqlim Dəyişmələri üzrə Çərçivə Konvensiyasının əsas maliyyə mexanizmidir. Fond inkişaf etməkdə olan ölkələrə iqlim dəyişikliyinə uyğunlaşma və təsirlərin azadılması təcrübələri sahəsində biliklərini artırmaqda və maliyyə təminatında kömək etmək üçün yaradılıb. Fondun yatırımları qrant, kredit, kapital və ya zəmanət şəklində ola bilər.