Dövlət başçısı: “Ermənistan işğaldan azad edilmiş torpaqları görməyəcək, onlar ora dönməyəcək”

“Biz böyük səbr göstəririk. Əlbəttə ki, Gəncə belə vəhşi atəşinə məruz qaldıqda bu, hər bir azərbaycanlını hiddətləndirir və adekvat cavab tələb olunur. Amma biz cavabı döyüş meydanında veririk”.

News24.az-ın məlumatına görə, bunu Azərbaycan Prezidenti İlham Əliyev “Haber Global” telekanalına müsahibəsində daimi atəşkəsin mümkün olub-olmaması barədə sualı cavablandırarkən bildirib.

Dövlət başçısı deyib ki, qurbanların qisası döyüş meydanında alınır: “Dünən itirilmiş qurbanlarımızın qisasını biz döyüş meydanında aldıq. Bizim münasibətimiz belədir. Biz heç vaxt mülki şəxslərə qarşı müharibə aparmamışıq, bu gün də aparmırıq. Bu, Azərbaycanı Ermənistandan fərqləndirən cəhətlərdən biridir. Ona görə də daimi atəşkəsin təmin olunması üçün ilk növbədə Ermənistan anlamalıdır ki, artıq işğaldan azad edilmiş torpaqları onlar görməyəcəklər, onlar ora dönməyəcəklər.  Bu, onlar üçün tamamilə imkansızdır. Kim nə deyirsə desin, kim onları dəstəkləyirsə dəstəkləsin, bu, olmayacaq. Biz bu torpaqlara gəldik, bu, bizim dədə-baba torpaqlarımızdır, bizi oradan heç bir qüvvə çıxara bilməz. Nə qədər bunu tez başa düşsələr, onlar üçün o qədər yaxşı olacaq. Çünki daimi atəşkəs üçün hər iki tərəfin buna sadiq olması lazımdır. Biz buna sadiqik. Biz günorta saat 12-dən qüvvəyə minmiş atəşkəsə riayət etmişdik. Amma görəndə ki, Ermənistan bunu pozur, təbii ki, biz buna səssiz qala bilməzdik. Biz də özümüzü müdafiə etməliyik. Beləliklə, demək olar ki, atəşkəs qüvvəyə mindi, amma real həyatda baş vermədi”.

“Ermənistanın Azərbaycanın işğal edilmiş torpaqlarından çəkilməsi ilə bağlı bir siqnal alırsınızmı” sualını da cavablandıran Prezident İlham Əliyev qeyd edib ki, belə bir siqnal almırıq: “Siqnallar var ki, atəşkəs təmin edilsin. Biz də deyirik ki, yaxşı, atəşkəs təmin edilsin, ancaq bununla bərabər gərək məsələ barış yolu ilə həllini tapsın. Hesab edirəm ki, Moskvada qəbul edilmiş açıqlama bizim maraqlarımıza tam cavab verir. Çünki ilk növbədə orada həlak olanların cəsədlərinin, hərbi əsirlərin humanitar əsaslarla dəyişdirilməsi nəzərdə tutulur.  Biz bunu ilk gündən istəyirdik, ancaq Ermənistan buna getmirdi. Bundan başqa, orada çox önəmli siyasi məqamlar var. Onlardan biri baza prinsipləri əsasında substansiv danışıqların davam etdirilməsidir. Baza prinsipləri isə bizim maraqlarımıza cavab verir. Çünki orada işğal edilmiş torpaqlardan erməni silahlı qüvvələrinin çıxarılması nəzərdə tutulur. Orada göstərilir ki, birinci mərhələdə beş rayondan, ikinci mərhələdə daha iki rayondan erməni silahlı qüvvələri çıxarılır. Ondan sonra da bütün məcburi köçkünlər əvvəl yaşadıqları bölgələrə qayıdırlar. Bu da o deməkdir ki, bizim məcburi köçkünlər Şuşaya da, Xankəndinə də qayıdacaqlar. Ondan sonra bu məsələnin siyasi çözümü təmin edilə bilər. Digər məsələyə gəlincə, Ermənistan hər zaman buna isti baxmırdı, müzakirələrin formatı dəyişməz olaraq qalır”.

Dövlət başçısı nəzərə çatdırıb ki, Ermənistan rəhbərliyi və Baş naziri Nikol Paşiyan hər zaman deyirdi ki, Azərbaycan “Dağlıq Qarabağ Respublikası” ilə danışıqlar aparmalıdır: “Biz isə buna etiraz edirdik. Ora belə bir bəndin salınması bizim maraqlarımıza cavab verir. Ona görə də artıq hərbi mərhələdən diplomatik-siyasi mərhələyə keçid üçün bütün imkanlar, bütün zəmin var. Qalır ki, Ermənistan bu atəşkəsə əməl etsin. Ümid edirəm ki, dünən və bu gecə Azərbaycanın müzəffər Ordusunun yeni uğurlu əməliyyatları onları buna məcbur edəcək”.