"Yaşlı şəxslər arasında koronavirusa yoluxma artıb" - Həkim

“Hazırda koronavirusa yoluxma artır”.

Bunu Azərbaycan Tibb Universitetinin (ATU) Yoluxucu Xəstəliklər kafedrasının dosenti İlham Bayramov deyib. O bildirib ki, dünən 946 nəfərin COVID-19-a yoluxma faktı təsdiqlənib: “Yoluxma sayının artması insanların qaydalara riayət etməməsi - maska taxmaması, ara məsafəsini gözləməməsi ilə əlaqədardır. Həmçinin payız fəslidir, qrip və digər kəskin respirator virus infeksiyaların artan dövrdür. Ona görə də sayda artım müşahidə olunur. Bildiyiniz kimi, cəbhədə döyüş gedir, bununla əlaqəli bəzən insanlar sıx toplaşır, belə halda isə xəstəliyə yoluxma artır. İnsanların fikri cəbhədə olduğuna görə qaydalara məsuliyyətsiz yanaşırlar. Ona görə əhali arasında maarifləndirmə işinin aparılması lazımdır. Şəhidlərimiz olur. Əksər insanlar onların yas mərasiminə gedir. Əksəriyyəti yaşlı şəxslərdir, deyirlər mütləq yas mərasimində iştirak etməliyəm. Onlarda isə immun sistemi zəifdir, risk faktoru daha yüksəkdir. Əvvəl koronavirusa yoluxma orta yaşlı insanlar arasında çox idisə, indi yaşlılar arasında daha çoxdur”.
İ. Bayramov yoluxma sayının daha da artacağı ilə bağlı xəbərdarlıq edib: "COVID-19-a yoluxma sayı daha da arta bilər. İctimai yerlərdə, nəqliyyatda sıxlıq olduğuna və insanlar maskadan düzgün istifadə etmədiyinə görə yoluxma halları artır". 

İ. Bayramov vurğulayıb ki, bəzən koronavirusu digər respuirator xəstəliklərlə qarşdırırlar: "Bu da kəskin respirator virus infeksiyasıdır. Sadəcə olaraq qripdə ağırlaşma olur, pnevmoniya sonradan əmələ gəlir. Koronavirusda isə ilk gündən əmələ gəlir. Bəziləri qripin ağırlaşmasını, boğulma tutmalarını koronavirusla səhv salırlar.  Bunlar koronavirusda ilk gündən olur. Diabeti, hipertoniya və xroniki tənəffüs xəstəlikləri olan  şəxslərdə bu əlamətlər ilkin gündən daha qabarıq görünür. Çünki həmin şəxslərdə koronavirusla yanaşı digər xəstəliklər olduğuna görə,  xəstəliyin gedişini ağırlaşdırır. Amma bəzən koronavirus assimptomatik şəkildə olur. Həmin şəxs analiz verməsə, bəlkə də virus aşkar edilməz”. 

Həkimin sözlərinə görə, sentyabrda məktəblər açıldığına görə virusa yoluxmanın artmasını onunla əlaqələndirirdilər: “İndi məktəb də yoxdur, amma koronavirusa yoluxma artır. Əhalinin sayı baxımından karantin rejiminin sərtləşdirilməsinə ehtiyac yoxdur, amma insanların məsuliyyətli  olması vacibdir”. /APA/