Azərbaycanla Ermənistan arasında dəyişdirilən əsirlərin SAYI AÇIQLANDI

“Bu günə qədər Azərbaycanla Ermənistan arasında Rusiya sülhməramlılarının vasitəçiliyi ilə 79 əsir dəyişdirilib". 

News24.az Rusiya mediasına istinadən xəbər verir ki, bunu Rusiya Xarici İşlər Nazirliyinin rəsmi nümayəndəsi Mariya Zaxarova bu gün keçirilən brifinqdə deyib. Erməni jurnalistin dəyişdirilən əsirlərin sayı ilə bağlı sualına cavab verən XİN rəsmisi bu problemə tərəflərin münasibətinin fərqli olduğunu bildirib: "İrəvan tərəfdən səslənən məlumatlar mütəmadi dəyişir. Bakıdan isə başqa məlumatlar verilir. Bu uyğunsuzluğu nəzərə alaraq, birbaşa tərəflərlə əlaqə saxlamağınızı tövsiyə edirəm. Əminəm ki, onlar sizə ətraflı məlumat verəcəklər. Bu günə kimi isə Rusiya sülhməramlılarının vasitəçiliyi ilə ümumilikdə 79 əsir mübadilə edilib. Onlardan 63-ü Ermənistan tərəfinə, 16-sı Azərbaycana təhvil verilib. Bu məsələdə bizim - rəsmi Moskvanın mövqeyini ifadə etmək istəyirəm: ən optimal variant “hamının hamıya” prinsipidir.
Güman edirik, məsələnin tezliklə həll olunması tərəflərə faciəvi səhifələri bağlamağa və əsas diqqəti iqtisadi sahədə əməkdaşlığı müsbət yöndə inkişaf etdirmək üçün yönəltməyə imkan verəcək”.