Təbiətə 12 min manat məbləğində ziyan vurulduqları ortaya çıxdı - FOTO

Bakı şəhəri, Ziya Bünyadov prospekti 1 ünvanında ağacların kəsilməsi ilə bağlı Dövlət Ekoloji Təhlükəsizlik Xidmətinə daxil olan məlumat əsasında aparılan araşdırma başa çatıb. 

Xidmətin rəsmisi Vaqif Cavadov News24.az-a bildirib ki, araşdırma zamanı ərazidə 50-dək çinar, şam və leylandr ağaclarının kökündən çıxarılaraq 
məhv edildiyi və təbiətə 12 min manat məbləğində ziyan dəydiyi müəyyən olunub.

Dəymiş ziyanın məbləği cinayət tərkibi yaratdığından toplanmış materiallar hüquq-mühafizə orqanlarına göndərilib.

"Aparılan araşdırma zamanı o da məlum olub ki, ağaclar "Magistral Ekspres" ASC tərəfindən  2020-ci ildə əkilib. Ərazinin  isə yüngül konstruksiyalı obyektlərin quraşdırılması məqsədilə
"Vətən Müharibəsi Əlillərinə Kömək" İctimai Birliyinə  verildiyi Birlik tərəfindən iddia olunur".

V.Cavadovun sözlərinə görə torpaq sahəsi ilə bağlı bir neçə müddətdir ki, tərəflər arasında  məhkəmə çəkişməsinin getdiyi aydın olub.

"Məhv edilmiş ağacların yerində artıq yeni ağaclar əkilib".