Tokio-2020: Açılış mərasimində məhdudiyyətin detalları bəlli oldu - FOTOLAR

Yaponiyanın paytaxtı Tokioda XXXII Yay Olimpiya oyunlarının bağlanış mərasimi keçirilib.

News24.az xəbər verir ki, bu gün Bakı vaxtı ilə saat 15:00-də başlanan mərasim Milli stadionda təşkil olunub.

Koronavirus pandemiyası üzündən 2020-ci ildən 2021-ci ilə təxirə salınan yarışın son tədbiri də boş tribunalar önündə keçirilib. İnfeksiyanın yaratdığı fövqəladə vəziyyət səbəbindən tamaşaçılarsız baş tutan mərasimdə yalnız xüsusi qonaqlar və nümayəndə heyətlərinin bir qismi iştirak edib.

Bədii hissəsi də orijinallığı ilə seçilən bağlanış mərasimi çərçivəsində dünya ölkələri olimpiyaçılarının yürüşü olub. Paradda yığmalar tam olmayan heyətlə stadiondan keçərək Tokio-2020 ilə vidalaşıb.

Azərbaycan yığması da tədbirdə boş tribunalar önündən keçib. Yalnız yarışın son günlərində Olimpiya həyəcanı yaşayan təmsilçilərimiz yer alıb. Ölkəmizin üçrəngli bayrağını sərbəst güləş yarışlarında gümüş medal qazanan Hacı Əliyev daşıyıb.

XXXII Tokio-2020 Yay Olimpiya Oyunlarının bağlanış mərasimi zamanı olimpiya məşəli söndürülüb. Üç ölkənin - Olimpiya oyunlarının vətəni Yunanıstanın, Yaponiyanın və növbəti Yay Olimpiya Oyunlarının keçiriləcəyi Fransanın bayraqları qaldırılıb.

Beynəlxalq Olimpiya Komitəsinin prezidenti Tomas Bax XXXII Tokio-2020 Yay Olimpiya Oyunlarını bağlı elan edib.

Növbəti Olimpiada 2024-cü il iyulun 26-dan avqustun 11-dək Parisdə baş tutacaq.

Qeyd edək ki, ötən il iyulun 24-dən avqustun 9-dək keçirilməli olan Olimpiada bu il iyulun 23-dən avqustun 8-dək təşkil edilib. Yarışda 205 ölkəni və qaçqınlar yığmasını təmsil edən 11 mindən çox idmançı 33 növ üzrə 339 dəst medal uğrunda mübarizə aparıb. Azərbaycanı 44 idmançı təmsil edib. Olimpiya oyunlarında Azərbaycan idmançıları 7 medal, o cümlədən 3 gümüş və 4 bürünc medal qazanıblar. /apa.az