Bunu törədən azğınlaşmış qəbilədir - Prezident

“Biz işğal dövründəki erməni faşizmi ilə bağlı əməli praktik işlər aparırıq”. 

News24.az xəbər verir ki, bunu Azərbaycan Prezidenti İlham Əliyev Anım Günü ilə əlaqədar xalqa müraciətində deyib. 

Dövlət başçısı bildirib ki, qələbəmiz erməni faşizmi üzərində əldə edilmiş qələbədir: “Ermənistanda hakimiyyət dəyişikliyi olub. Ancaq onların xisləti dəyişməyib. Azərbaycana qarşı olan nifrət rəsmi ideologiya kimi bərpa edilib. Azad edilmiş ərazilərə gələn hər insan dəhşətə gəlir. Bunu törədən insan hətta heyvan da deyil. Bunu törədən azğınlaşmış qəbilədir. Bunu bütün dünya görməlidir”.

Dövlət başçısı deyib ki, 44 gün Azərbaycan Silahlı Qüvvələri düşmən ordusunu məhv edərək öz ərazi bütövlüyünü bərpa edib: “Mən dəfələrlə demişdim ki, Azərbaycan xalqı heç vaxt işğalla barışmayacaq. Dəfələrlə demişdim ki, nəyin bahasına olursa olsun, öz torpaqlarımızı geri qaytaracağıq. Dəfələrlə demişdim ki, düşmən öz xoşu ilə torpaqlarımızdan çıxmasa, biz onu torpaqlarımızdan qovacağıq. Belə də oldu. Biz Birinci Qarabağ müharibəsindəki məğlubiyyətlə barışmadıq, güc topladıq, bütün gücləri səfərbər etdik, Ordumuzu gücləndirdik. Ölkə iqtisadiyyatını gücləndirdik, ölkəmizin nüfuzunu qaldırdıq və öz tarixi missiyamızı şərəflə yerinə yetirdik. Düşməni torpaqlarımızdan qovduq və ədaləti, beynəlxalq hüququ bərpa etdik. Biz milli ləyaqətimizi bərpa etdik. Bu gün Azərbaycan xalqı müzəffər xalq kimi yaşayır. Bu gün Azərbaycan dövləti qalib dövlət kimi yaşayır. Bundan sonra biz müzəffər xalq və qalib dövlət kimi əbədi yaşayacağıq”.