Smartfon və planşetlərin azyaşlıların gözünə hansı zərərləri var?

Son dövrlərdə istər azyaşlı, istərsə də məktəb yaşlı uşaqlar arasında smartfon və planeştlərdən istifadə geniş yayılıb. Təbii ki, texnologiyanın inkişaf etdiyi bir dövrdə bu qaçılmaz haldır. Lakin bəzən valideynlər özləri qəsdən uşaq səs salmasın, başı qarışsın və ən əsası öz rahatlığı üçün övladına mobil telefon verirlər. Təsadüfi deyil ki, bu gün məhz bu problemlə bağlı Kliniki Tibbi Mərkəzə müraciət edən uşaqların sayında artım müşahidə edilir.

KTM-in həkim-oftalmoloqu Səfurə Acalovanın sözlərinə görə, bu gün uşağını göz həkiminə gətirən valideynlərin əksəriyyəti mobil telefonlardan şikayətçidir:"Smartfonların uşaqların psixologiyası ilə yanaşı gözünə də çox böyük mənfi təsirləri var.  Müasir dövrdə bu cihazları tamamilə uşaqlardan uzaqlaşdırmaq mümkün deyil, amma müəyyən qədər gözlənilən ziyanları minimuma endirmək olar.  
İlk növbədə uşağın telefon, planşet və yaxud kompüterlə arasında olan məsafəyə diqqət yetirmək lazımdır. Ekranın parlaqlığı gözün qıcıqlandırmayacaq səviyyədə tənzimləmək lazımdır. Uşaqların bu cihazlardan istifadə etməsinə isə çox qısa zaman intervalları müəyyənləşdirmək lazımdır. Valideynlər mütləq bu məqama diqqət yetirməlidir". 

Oftalmoloq qeyd edib ki, hər bir valideyn bilməlidir ki, monitora fasiləsiz baxan uşaqlarda göz qırpma sayı azalır. Bu isə gözün qurumasına səbəb olur ki, buna quru göz sindromu deyilir:"Belə uşaqların gözlərində qızarma, yanma, blefarit (kirpik dibinin ikitərəfli residivləşən iltihabı) müşahidə olunur. Həmçinin, uzun müddət smartofona baxan və eynəyə ehtiyacı olan uşaqlarda görmə daha da zəifləyir, eynəyin dərəcəsi daha sürətlə artır. Qaranlıq yerdə smartfona baxmaq isə daha ciddi fəsadlara səbəb olur. Çünki texnoloji cihazların mavi şüası göz sinirini gərginləşdirir. Göz siniri gərginləşdikdə isə uşaqlarda baş ağrısına səbəb olur. Həmçinin, uzun müddət ultra-bənövşəyi şüalara məruz qalan uşaqların gözündə  katarakta yaranma riski də artır".

Həkim əlavə edib ki, bu gün valideynlərin böyük əksəriyyəti özü telefonu uşağa verir ki, başı qarışsın, amma sonra da şikayət edir ki, uşaq çox baxır, telefona, orada çox oyun oynayır. Bütün hallarda uşaqlarla bu cihazlar arasında müəyyən sərhədlər qurmaq lazımdır. Əks halda gələcəkdə fəsadları ağır olur.