Avstraliyada tarixi qorumaq üçün addım: “Earth’s Black Box” layihəsi hazırlanır

Avstraliyada insanlığın məhvi halına hazırlıqlı olmaq üçün “qara qutu” inşa ediləcək.

News24.az xəbər verir ki, Tasmaniyanın qərb hissəsində “Earth’s Black Box” layihəsi həyata keçirilir – təxminən on metr uzunluğunda polad konstruksiya insanlığın tarixini və onun yox olmasının mümkün səbəblərini qeydə alacaq.

7,5 santimetr qalınlığında poladdan hazırlanan qurğu geoloji cəhətdən sabit və uzaq bir ərazidə qranit bünövrə üzərində yerləşəcək.

Qurğu günəş enerjisi ilə işləyəcək və əsrlərlə müstəqil fəaliyyət göstərəcək. İçərisində məlumat saxlama sistemləri olacaq, hava və okean temperaturu, dənizlərin turşuluq səviyyəsi, enerji istehlakı, həmçinin siyasi qərarlar, xəbərlər və sosial şəbəkə paylaşımları davamlı olaraq qeydə alınacaq.

Layihə müəllifləri bildirirlər ki, qlobal çökmə halında “qara qutu” gələcək nəsillərə baş verənləri anlamağa kömək edəcək. Sistemin tam işə salınması 2026-cı ildən gec olmayaraq planlaşdırılır.