İran ABŞ-nin təkliflərinə rəsmi cavab verdi

İranın ABŞ-yə cavabı dünən gecə rəsmi şəkildə göndərilib.

News24.az xəbər verir ki, məlumatlı mənbə “Tasnim” xəbər agentliyinə ABŞ-nin 15 maddəlik təklifinə İranın cavabının dünən gecə vasitəçilər yolu ilə rəsmi şəkildə göndərildiyini və İran qarşı tərəfin cavabını gözlədiyini bildirib.

Mənbənin sözlərinə görə, İran cavabında bəyan edib ki, “düşmən tərəfindən həyata keçirilən təcavüz və terror dayandırılmalı”, müharibənin yenidən baş verməyəcəyinə dair real şərait yaradılmalı, müharibə zərərlərinin və kompensasiyaların ödənilməsi təmin olunmalı və aydın şəkildə müəyyənləşdirilməlidir.

Həmçinin müharibənin bütün cəbhələrdə və bu münaqişədə iştirak edən bütün “müqavimət qrupları” üzrə regionun hər yerində başa çatdırılması təmin olunmalıdır.

O qeyd edib ki, İranın Hörmüz boğazı üzərində suverenlik tətbiq etməsi onun təbii və qanuni haqqıdır, belə də qalacaq. Eyni zamanda qarşı tərəfin öhdəliklərinin icrasına zəmanət verilməsi də şərtlərdən biridir.

Mənbə vurğulayıb ki, İran üçün artıq aydındır ki, ABŞ-nin danışıqlarla bağlı iddiası sadəcə “üçüncü aldatma” planıdır və amerikalılar bu iddia altında bir neçə məqsəd güdürlər. (Apa)