"Liv Bona Dea" Nigar Köçərlinin iddialarına cavab verdi

“Əli və Nino” kitab mağazaları şəbəkəsinin rəhbəri Nigar Köçərlinin iddialarına “Liv Bona Dea" hospital aydınlıq gətirib.

Bu barədə News24.az-ın sorğusuna cavab olaraq xəstəxanadan bildirilib ki, məsələ ilk gündən diqqətlə araşdırılmağa başlanılıb:

"Qeyd olunan məsələ ilə bağlı xəstə yaxınları ilə hospitalımızın baş həkimi şəxsən əlaqə saxlayıb, baş vermiş hallar ətraflı şəkildə müzakirə edilib. Xəstə əməliyyatdan sonra oyanma otağında tibbi protokollara tam uyğun olaraq nəzarətə götürülüb və ilkin mərhələdə müvafiq ağrıkəsici dərmanlar və anestezioloji preparatlar tətbiq edilib. Anesteziya təsiri altında olan xəstənin fiziki müayinə və ağrı kontrolu sonrası əsas müalicə həkimi ilə müzakirə edilərək klinik vəziyyətinə uyğun şəkildə epidural kateter tətbiq olunub. Tədbiq olunmuş tibbi müdaxilələr və əməliyyatın uğurla tamamlanması ilə bağlı müalicə həkimi xəstənin həyat yoldaşına da məlumat verib. Xəstə anatomiyası və icra olunan əməliyyatın növü ağrı kontrolu prosesinin müddətinə təsir edir. Bu xəstədə də ümumi əməliyyatxanadan yatış otağına göndərilməsi prosesi gözləniləndən daha çox zaman alıb.

Xəstə əməliyyatdan çıxdığı gün Anesteziologiya şöbəsinin rəhbəri tərəfindən yatış otağında müayinə olunub və ağrısının azaldığı təsbit edilib. Anestezioloqun ikinci günkü müayinəsində xəstənin komfortu üçün epidural kateterin xəstənin çıxış edəcəyi ana qədər saxlanılması qərarı alınıb".

Xəstəxanadan bildirilib ki, xəstənin yatış otağında olarkən də məmnuniyyət şöbəsi və baş tibb bacısı tərəfindən ziyarət edilib, şikayətləri dinlənilib və araşdırmalara başlanılıb:

"Xəstə xəstəxanadan sağalaraq evə çıxış etdikdən sonra araşdırmalarımızın nəticəsi baş həkimimiz tərəfindən həyat yoldaşına telefon zəngi vasitəsi ilə də məlumat verilib. Aidiyyəti şikayətlər və sosial media paylaşımları bizim üçün nə qədər üzücü olsa da xəstəmizin sağalaraq evinə yola salınması bizim ən böyük xoşbəxtliyimizdir.

Yuxarıda qeyd olunanlar xaricində imicimizə zərər vurmağa yönəlmiş qeyri- etik yanaşmaların heç birini qəbul etməməklə bərabər iddiaların tərəfimizə hüquq müstəvisində rəsmi şəkildə yönləndiriləcəyi halda müvafiq orqanlara tibbi qeydləri və bütün xəstələrimizin məhrəmiyyətini qoruyan kamera qeydlərimizi də paylaşmağa hazırıq".