Ocaq Necatla videosu yayılan meyxanaçı: “Xəyanət edən şərəfsizdir” - VİDEO/FOTO

İran İslam Respublikasının ali rəhbəri ayətullah Seyyid Əli Xameneinin Azərbaycandakı sabiq nümayəndəsi Ocaq Necat ilə azərbaycanlı meyxanaçıların görüşdüyü video görüntülər yenidən sosial mediada gündəmə gəlib. El şənliyində 2021-ci ildə lentə alınan görüntülərdə meyxanaçılar Baləli, Tərlan Novxanı və Mehman Əhmədli Ocaq Necatla salamlaşır. Sözügedən anlar sosial şəbəkə istifadəçiləri tərəfindən birmənalı qarşılanmayıb və onlar “İrana işləməkdə” ittiham olunub.

Mövzu ilə bağlı News24.az olaraq meyxanaçı Mehman Əhmədli ilə əlaqə saxladıq. Meyxanaçı açıqlamasında bildirdi ki, dövlətimizin düşməni olan hər dövlətə nifrət edir:

“Video köhnədir. Ocaq Necat ağsaqqal, din adamıdır. Biz də qarşılaşmışıq və salamlaşmışıq. Mən xalqımı, dövlətimi sevirəm. Dövlətim, vətənim üçün çalışıram. Dövlətimə qarşı olan hər ölkədən zəhləm gedir. Fərqi yoxdur bu İrandır, yoxsa hansısa ölkədir.  Dövlətinə xəyanət edən insanlar şərəfsizdir. İnsan öz dövlətini, millətini sevər, öz ölkəsinə xidmət edər.  Sadəcə bir məclisdəki ağsaqqala salam vermək kiməsə işləməkdirsə, belə düşünmək ağılsızlıqdır. Mən hər zaman ölkəmi sevəcəm, dövlətim üçün çalıçacam”.

Meyxanaçılar Balaəli və Tərlan Novxanı ilə əlaqə saxlasaq da, zənglərimiz cavabsız qaldı. 

Qeyd edək ki, Ocaq Nicatın Azərbaycanda ofisi bağlanıb və o 2021-ci ildə İrana qayıdıb.

Könül İbrahim