Nyu-Yorkun mərkəzində Azərbaycan Bayrağı UCALDILDI

ABŞ-ın Nyu-York şəhərinin maliyyə mərkəzi hesab olunan “Wall Street” küçəsində yerləşən məşhur “Bowling Green” parkında 18 Oktyabr – Müstəqilliyin Bərpası Günü münasibətilə Azərbaycan Dövlət Bayrağının qaldırılma mərasimi keçirilib.

News24.az xəbər verir ki, bu barədə Diasporla İş üzrə Dövlət Komitəsi bildirib. Azərbaycan Nyu-York Assosiasiyası üzvlərinin təşkilatçılığı ilə baş tutan mərasimdə şəhər meriyasının təmsilçiləri, azərbaycanlı diplomatlar, soydaşlarımız və yerli ictimaiyyətin nümayəndələri iştirak ediblər.

Azərbaycan Nyu-York Assosiasiyasının prezidenti Ercan Yerdələnli və vitse-prezidenti Zəminə Mirhadıyeva mərasim iştirakçılarını bayram münasibətilə təbrik ediblər. Builki bayramın fərqli olduğuna, Azərbaycanın ərazi bütövlüyünün və suverenliyinin Qarabağ üzərində tam bərpa edilməsi fonunda keçirildiyinə diqqəti cəlb ediblər.

Sonra Azərbaycan Dövlət Himninin sədaları altında üçrəngli şanlı bayrağımız Nyu-York səmasına ucaldılıb və ABŞ bayrağı ilə yanaşı dalğalandırılıb.

Tədbir zamanı soydaşlarımız və şəhərin turistləri Azərbaycan bayrağının fonunda şəkillər çəkdiriblər.

Qeyd edək ki, Azərbaycan Dövlət Bayrağı şəhərin ilk rəsmi parkı və nəhəng bayraq meydanı kimi tanınan “Bowling Green”də 10 gün müddətində dalğalandırılacaq. Oktyabrın 27-dən isə Azərbaycan Bayrağını Türkiyə Bayrağı əvəz edəcək. Türkiyə Respublikasının yaranmasının 100 illiyi münasibətilə bu yerdə qardaş ölkənin bayrağı ucaldılacaq.