"Həbsim sifarişlidir" — Modelə zorakılıq edən sevgilisindən AÇIQLAMA

Model Raziyyat (Razi) Əliyevaya qarşı zorakılıqda ittiham olunan Ziya Hüseynzadənin barəsində olan cinayət işi üzrə məhkəməsi keçirilib.

News24.az Demokrat.az-a istinadla xəbər verir ki, bu gün Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən prosesdə zərərçəkmiş şəxsin nünayəndəsi prosesin qapalı keçirilməsi barədə verdiyi vəsatət müzakirə edilib.

Hakim deyib ki, vəsatət qismən təmin edilib və prosesin qismən qapalı keşirilməsi barədə qərar qəbul edilib. 

Bildirilib ki, şəxsi həyat və peşə fəaliyyəti ilə bağlı sirr təşkil edilən hissələrdə məhkəmə prosesi qapalı keçiriləcək. 

Prokuror Cövdət Mehrəliyev bildirib ki, cinayət işini ibtidai araşdırılması zamanı qanun pozuntusuna yol verilməyib. 

O işin məhkəmə baxışına verilməsini istəyib. 

Təqsirləndirilən şəxsin vəkilləri, həmçinin zərərçəkmiş şəxsin vəkilləri də işin məhkəmə baxışına verilməsinə etiraz etməyiblər.

Təqsirləndirlilən Ziya Hüseynzadə cinayət işini məhkəmə baxışına verilməsin etiraz etməyib. 

Bildirib ki, həbsinin sifarişi olmasını sübut edən sənədləri məhkəməyə təqdim edəcək. 

O bildirib ki, bu halların məhkəmə baxışında obyektiv araşdırılmasına inanır.

Daha sonra hakimlər müşavirəyə yollanıb. 

Müşavirədən qayıdan hakim heyəti hazırlıq iclasının qərarını elan ediblər.

Məhkəmə baxışı yanvarın 22-ə təyin edilib.

Qeyd edək ki, model Raziyyat (Razi) Əliyevanın üzərindəki xəsarətlərlə bağlı sosial şəbəkələrdə yayılan görüntülər araşdırılarkən həmin hadisənin mayın 26-da baş verdiyi müəyyənləşdirilib.

İddia olunub ki, Ziya Hüseynzadə Razi Əliyevanın Lökbatan qəsəbəsində anasına məxsus mənzilində nalayiq ifadələr səsləndirib, zor tətbiq edərək, giriş qapısını zədələyib.

2017-ci ildə Azərbaycan gözəli seçilmiş model Razi Əliyeva iddia edir ki, sevgilisi olmuş Ziya Hüseynzadə ona və ailəsinə qarşı zorakı hərəkətlər edib, onların ünvanına təhqir və təhdid xarakterli ifadələr səsləndirib.

Ziya Hüseynzadə Cinayət Məcəlləsinin 133 (əzab vermə), 177.3 (oğurluq – yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla törədildikdə), 182.3.2 (hədə-qorxu yolu ilə tələb etmə), 186 (əmlakı qəsdən məhv etmə və ya zədələmə), 221.1 (xuliqanlıq) və başqa maddələrilə ittiham olunur.

Ziya Hüseynzadə keçmiş Baş nazir Novruz Məmmədovun qohumu olduğun iddia edilir.

Ziya Hüseynzadənin cinayət işi üzrə zərərçəkmiş qismində Raziyyat Əliyeva, Xadijat Əliyeva, Gülnar İsayeva zərərçəkmiş qismində tanınıblar.

Xatırladaq ki, Ziya Hüseynzadə biznes fəaliyyəti ilə məşğul olub. 

O, “PKF Audit Azerbaijan” MMC-yə rəhbərlik edir.