Rusiya ABŞ-a xəbərdarlıq etdi

ABŞ və Rusiya müdafiə nazirləri bir ildən artıq müddətdən sonra dünən telefonla danışıblar.

News24.az xəbər verir ki, Rusiya həftə sonu Krımda Ukraynanın ölümcül hücumuna görə Vaşinqtonu günahlandırdıqdan sonra gərginlik artıb.

Hər iki tərəf ABŞ-ın müdafiə naziri Lloyd Ostin ilə may ayında Sergey Şoyqunun yerinə təyin edilmiş Rusiyanın yeni müdafiə naziri Andrey Belousov arasında ilk görüşlə bağlı fərqli açıqlamalar verib.

Pentaqon bildirib ki, Ostin və Belousov açıq kommunikasiya xətlərinin əhəmiyyətini müzakirə ediblər.

Pentaqonun sözçüsü Hərbi Hava Qüvvələrinin general-mayoru Patrik Rayder jurnalistlərə bildirib ki, görüşün təşəbbüskarı Ostin olub. Bu, 2023-cü ilin martından bəri ilk görüşdür.

Rusiya Müdafiə Nazirliyi bildirib ki, Belousov Ostinə ABŞ-ın 28 aydır davam edən müharibədə Ukraynaya silah tədarükünü davam etdirməsinin təhlükələri barədə xəbərdarlıq edib.

Günel Məlikzadə