Kişi “sən atanın oğlu deyilsən” deyən əmisini döydü

Bakı Apellyasiya Məhkəməsində qəsdən sağlamlığa az ağır zərər vurmada təqsirləndirilən Şahin Baxışovun (şərti) barəsindəki hökmdən verilən apellyasiya şikayəti üzrə məhkəmə iclası başa çatıb.

News24.az xəbər verir ki, Pravda.az-ın əldə etdiyi məlumata görə, hakim Əfqan Ələkbərovun sədrliyi ilə keçirilən prosesdə qərar elan olunub. Qərara əsasən, şikayət təmin edilməyib.

İttihama görə, hadisə 2023-cü ildə paytaxtın Binəqədi rayonu ərazisində yerləşən fərdi yaşayış evində qeydə alınıb. Belə ki, Şahin Baxışov əmisi, zərərçəkmiş Mahir Baxışovla (şərti) mübahisə edib. Bu zaman əmisi ona “sən atanın oğlu deyilsən” ifadəsini işlədib. Təqsirləndirilən şəxs də zərərçəkmişin bu sözünü ünvanına təhqir kimi qəbul edib. Sonra o, qəsdən yumruqla əmisinin sifət nahiyəsinə vurub. Mahir yerə yıxıldıqdan sonra Şahin əl və təpiklə onun bədəninin müxtəlif nahiyələrinə zərbələr endirərək, əmisinə xəsarət yetirib. Hadisədən sonra Şahin Baxışov saxlanılaraq cinayət məsuliyyətinə cəlb edilib. Binəqədi Rayon Məhkəməsinin hökmü ilə o, 9 ay müddətinə azadlıqdan məhrum edilib.