Tanınmış jurnalist Tural Ozan RTV ilə əməkdaşlığa BAŞLADI - FOTOlar

Tanınmış jurnalist və teleaparıcı Tural Ozan yenidən aparıcılıq edəcək.

News24.az bildirir ki, üç illik fasilədən sonra ekranlara qayıdan aparıcı bu xəbəri təsdiqləyib.

O bildirib ki, tezliklə ölkənin sosial, iqtisadi və siyasi gündəmindən bəhs edən bir proqram ilə tamaşaçıların qarşısına çıxacaq:

"Bildiyiniz kimi, 15 ilə yaxın bir televiziya və media təcrübəm var. Müxtəlif telekanallarda dövrünün ən reytinqli verilişlərinin aparıcısı olmuşam. Əvvəllər tok şou formatında verilişlərlə tanınsamda son illər  sosial, siyasi və informasiya verilişlərim olub. Efirdə son illərim isə Lider TV-də olub. Kanal bağlanan günə qədər orada Səda Gündəm analitik informasiya proqramını tamaşaçılara təqdim etmişəm. Bildiyiniz kimi, mənim artıq uzun müddətdir digər peşə fəaliyyətlərimdə var deyə televiziyaya tam vaxt ayıra bilmirəm. Əslində problem təkcə vaxt bu deyildi. Son illər həmçinin televiziyalarda olan vəziyyət və fəaliyyətləri məni qane etmirdi ona görə bir növ uzaqlaşmışdım. Amma ictimaiyyətlə əlaqələr sektorunda da fəaliyyətim olduğu üçün çoxda tamamən ayrı qalmaq olmur. Ona görə də RTV ilə anlaşdıq. Ölkənin sosial, iqtisadi və siyasi gündəmindən bəhs edən bir proqram ilə qarşınızda olacağıq. Mənim formatıma uyğun bir layihədir. Tamaşaçılar yenə mənim xəbərlərə xüsusi şərhlərimi və yanaşmamı görə biləcəklər. Ölkədə tanınmış sosial, ictimai və siyasi şəxslər qonağım olacaq", - deyə o vurğulayıb. 

Qeyd edək ki, Tural Ozan ölkənin müxtəlif televiziyalarında teleaparıcı kimi çalışıb, müxtəlif media layihələrinə rəhbərlik edib. Tural eyni zamanda sosial-siyasi arenada da aktiv fəaliyyətdədir. 2020 və 2024-cü illərdə Milli Məclis seçkilərində deputatlığa təsdiqlənmiş namizəd olaraq çıxış edib. Təcrübəli jurnalist eyni zamanda uzun illərdir marketinq və ictimaiyyətlə əlaqələr sahəsində də ekspert-mütəxəssis olaraq çalışmaqdadır.